एजेन्सी । ठूला र सम्पन्न मुलुकबीच अब आणविक होइन जैविक युद्ध चलिरहेको छ । तर त्यो युद्ध सामान्य मानिसले पत्तो पाउँदैन । त्यहाँ त बमबारी हुन्छ नत सैनिकको उपस्थिति नै हुन्छ । पछिल्ला केही वर्षयता चीन र क्युबामा अमेरिकी दूतावासका कैयौं स्टाफ रहस्यमय तरिकाले बिरामी भएका थिए ।
यी घटनाहरुको जाँचपछि अमेरिकाको नेशनल एकेडेमी अफ साइन्सेजले उनीहरुमाथि माइक्रोवेभ ऊर्जाबाट आक्रमण गरिएको आशंका सबेभन्दा अधिक भएको बताएको छ । सीएनएनको रिपोर्टअनुसार नेशनल एकेडेमी अफ साइन्सेजले आफूले जाँच गरेका केसहरुमा ‘पल्स्ड रेडियो फ्रिक्वेन्सी इनर्जी’को प्रयोग गरिएको संकेत पाइएको बताएको छ ।
रिपोर्टमा सोचविचार गरिएको रणनीति अन्तर्गत माइक्रोवेभ ऊर्जाको प्रयोग गरिएको भनिएको छैन तर आपराधिक प्रकृतिका मानिसहरु यसको पछाडि हुन सक्ने भनिएको छ । डाक्टर र वैज्ञानिकहरुको १९ सदस्यीय कमिटीले अमेरिका सरकारको अनुरोधमा यो जाँच गरेको हो । २०१७ मा मार्क लेन्जी नामका अमेरिकी कूटनीतिज्ञ ग्वान्झाउमा तैनाथ थिए । एक दिन उनी रहस्यमय तरिकाले बिरामी भए र उनलाई टाउको दुख्न थाल्यो । पद्न पनि समस्या हुन थाल्यो । स्मरणशक्ति कमजोर हुने र निद्राको समस्या पनि सुरु भयो ।
मार्क लेन्जीको एमआरआइ स्क्यानमा उनको मस्तिस्कको २० भागको घनत्व कम भएको पाइएको छ । खासगरी ती भागको घनत्व कम भएको थियो जो स्मरणशक्ति र भावनात्मक विषयसँग सम्बन्धित हुन्छन् । अर्कोतर्फ मस्तिस्कका तीन भागको भने घनत्व बढेको पाइयो । अनुसन्धानकर्ताका अनुसार मस्तिस्कका कैयौं भागको घनत्व कम हुनु ब्रेन इन्जुरीको संकेत हुन सक्छ ।
अमेरिकी अधिकारीहरुमा यस्ता आक्रमण धेरैजसो २०१६ र २०१७ मा भएका थिए । केही केसहरु भने २०१७ पछि पनि देखिएका थिए । नेशनल एकेडेमी अफ साइन्सेजले माइक्रोवेभ हतियारका विषयमा चिन्ता जाहेर गरेको छ । विश्वमा माइक्रोवेभ हतियार भएका देशहरु निकै कम छन् । यी देशहरुमध्ये रुसलाई पनि गनिन्छ । क्युबामा अमेरिकी अधिकारीहरु रहस्यमय तरिकाले बिरामी हुनुको पछाडि रुस जिम्मेवार भएको आशंका गरिन्छ ।
