अष्ट्रेलिया। विदेशमा अलपत्रपरेका नेपालीहरुलाई फिर्ता गर्ने अभियान नेपाल सरकारले थालेको छ । सरकारले चार्टड विमानमार्फत विभिन्न देशबाट आफ्ना नागरिकलाई उद्धार गरिरहेको छ । अष्ट्रेलियामा सयौँको संख्यामा नेपाल फर्कन चाहने रहेका छन् । तर उनिहरुको लागि स्वदेश यात्रा खर्चिलो हुने भएको छ । सरकारले उद्धार गर्न लागेको ३० देश मध्ये प्रमुख श्रम गन्तव्य साउदी, कुवेत, मलेसियालगायतका देशबाट आउने नेपालीहरूका लागि हवाई भाडा दोस्रो पटक घटाएको छ । तर अन्य देशको भने यथावत नै रहेको छ । पहिलो चरणको प्राथमिकतामा परेका ३० देशका २४ हजार १४८ नेपाली स्वदेश फिर्ता हुँदैछन् । नागरिकहरूलाई स्वदेश आउन सहजीकरण गर्ने सम्बन्धी आदेश २०७७ अनुसार यही असार ३ गते बुधबार पहिलो र ८ गते सोमबार दोस्रो चार्टर उडानमार्फत पीडितलाई नेपाल पठाउन लागेको छ ।
अष्ट्रेलियाबाट नेपाल फर्कने विमान भाडा १६ सय १५ अमेरिकी डलर अर्थात झण्डै १ लाख ९५ हजार भन्दा बढी नेपाली रुपियाँ भाडाकै लागि एकजना व्यक्तिले खर्चनु पर्ने भएको छ । विभिन्न भिषामा आएका १३ सय नेपालीले स्वदेश फर्कनका लागि नेपाली दूतावास क्यानवेरामा फारम भरेका छन् । नेपाल गएर क्वारेन्टाईनमा बस्ने खर्च समेत आफैले व्यहोर्नुपर्ने भएकाले पनि स्वदेश यात्रा खर्चिलो हुने देखिएको छ । भाडा मंहगो परेपछि फारम भरेका नेपाली समेत दोधारमा परेका छन् ।
यसैगरी नेपाल फर्कने यात्रुहरुले पीसीआर र आरडीटी टेस्ट नेगेटिभ रहेको प्रमाण पेश गर्नु पर्नेछ । यस्तो परीक्षण दूतावासले जानकारी गराएपश्चात मात्र गर्न पनि दूतावासले अनुरोध गरेको छ । साथै यात्रुहरु नेपाल पुगेपछि नेपाल सरकारको नियमानुसार क्वारेन्टाइनमा बस्नुपर्ने सूचनामा उल्लेख गरिएको छ ।
यस्ताे छ दूतावासकाे सूचना
