काठमाडौं । गत आर्थिक वर्षको मुनाफाबाट बोनस शेयर वितरण गर्ने प्रस्तावसहित लुम्बिनी जनरल इन्स्योरेन्सले साधारण सभा आह्वान गरेको छ । इन्स्योरेन्सले असार २४ गते कम्पनीको कार्यालय, ज्ञानेश्वरमा १५ औँ वार्षिक साधारण सभा डाकेको हो। सभामा आर्थिक वर्ष २०७५–७६ को मुनाफाबाट ८.१२५ प्रतिशत बोनस शेयर र सोको कर प्रयोजनार्थ ०.४०६ प्रतिशत नगद लाभांश वितरण गर्ने प्रस्ताव रहेको छ। यसका साथै, सभाले सञ्चालकको संख्या घटाउने र सो प्रयोजनको लागि नियमावलीको नियम ८(२) संशोधन गर्ने र सर्वसाधारण शेयरधनीहरुको तर्फबाट २ जना सञ्चालक नियुक्त गर्ने प्रस्ताव पनि पारित गर्नेछ। साधारण सभा प्रयोजनको लागि इन्स्योरेन्सले असार ८ गते एक दिनका लागि बुकक्लोज गर्ने भएको छ। यस अनुसार असार ७ गतेसम्म नेप्सेमा कारोबार भई कायम शेयरधनीहरुले साधारण सभामा भाग लिन तथा लाभांश प्राप्त गर्न सक्नेछन्।