काठमाडौं । प्रविधिको प्रयोगले बजारमा जति सहजता सिर्जना गरेको छ त्यतिकै रुपमा बेला बेलामा जोखिम पनि व्यहोर्नु परेको छ । बैंकहरुको सिस्टम ह्याक गरी बेला बेला विदेशी नागरिकहरुले पैसा उम्काउने गरेको घटना नौलो होइन । यसपटक ठूलो गिरोह नेपाल प्रहरीको कब्जामा परेको छ । यो प्रकरणमा थप तीन जना नेपाली पनि पक्राउ परेका छन् ।
नेपाल प्रहरीले एटिएमको प्रणाली ह्याक गरेर पैसा चोरी गर्ने प्रकरणमा थप तीन जना नेपाली पक्राउ गरेको हो । महानगरीय प्रहरी परिसर काठमाडौंको टोलीले सोमबार ठमेल क्षेत्रबाट उनीहरुलाई नियन्त्रणमा लिएको हो । प्रहरीले ठमेलमा रहेको डेस्सो र नेपालय मनि चेन्जरका देवनाथ लामिछाने, रोसन श्रेष्ठ र रेवती दवाडीलाई नियन्त्रणमा लिएको बताएको छ ।
शनिवार फरार भएका व्यक्तिहरुले मनिचेन्जरबाट २९ लाख ९९ हजार रुपैयाँ डलरमा साटेको देखिए पछि अनुसन्धानको लागि उनीहरुलाई नियन्त्रणमा लिइएको महानगर प्रहरी परिसरले बताएको छ ।
प्रहरीले शनिबार एटीएमबाट रकम निकाल्ने ५ जनालाई पक्राउ गरेको थियो भने थप एक जनालाई विमानस्थलबाट पक्राउ गरेको छ । प्रहरीको टोलीले आइतबार राति सु लु सिङ नाम गरेका चिनियाँ मुलका फेन्च नागरिकलाई त्रिभुवन विमानस्थलबाट नियन्त्रणमा लिएको थियो । प्रहरीले उनीहरुको साथबाट १ करोड २६ लाख नेपाली रुपैयाँ र ९ हजार अमेरिकी डलर बरामद गरेको छ ।