काठमाडौं । कतारको प्रहरी सेवामा पहिलो पटक १ सय ७९ जना नेपाली भर्ती भएका छन् । अन्य कामदारमा मात्रै नेपाली युवा लैजाने गरेको कतारले पहिलो पटक नेपालीलाई प्रहरी सेवामा भर्ती गरेको हो । कतार प्रहरीमा भर्ती भएका नेपालीहरुको चार महिने प्रहरी तालिम समेत सकिएको छ । उनीहरु अब तत्काल कतार प्रहरीको रुपमा कार्यस्थलमा खटिने भएका छन् ।
यसअघि कतारले पाकिस्तान नागरिकलाई मात्रै प्रहरी सेवामा लैजाने गरेको थियो । कतारमा नेपालीको संख्या बढ्दै गएकोले प्रहरी सेवामा नेपालीलाई नै अवसर दिइएको कतारले बताएको छ । कतारमा करिव चार लाख ५० हजार नेपाली छन् । प्रहरी सेवामा नेपालीको उपस्थितिले नेपाली कामदारलाई सुरक्षा सेवा दिन थप प्रभावकारी हुने कतारले विश्वास लिएको छ ।
प्रहरी तालिमको समापनमा बोल्दै नेपाली दूतावासका उपनियोग प्रमुख लक्ष्मण खनालले इमानदारीताका साथ कायस्थलमा आफ्नो दायित्व निर्वाह गर्न नेपालीलाई आग्रह गरे ।
उनले नेपालीलाई प्रहरी सेवा अवसर दिने कामले नेपाल र कतारबीचको सम्बन्ध थप उचाइमा पुग्ने विश्वास व्यक्त गरेका थिए ।