काठमाण्डौ । कोरोना कहरले काठमाडौं उपत्यका आक्रान्त भएको बेला उपत्यकाका तीनवटा जिल्लामा जारी निषेधाज्ञा जेठ १३ गतेसम्म थपिएसँगै थप कडाई गरिने भएको छ । यसअघि थपिएको अवधिसम्म कडा स्वास्थ्य मापदण्डका बीच खुलेका क्षेत्रहरु समेत बन्द हुने गरी निषेधाज्ञाको अवधि थप गर्ने काठमाण्डौ, ललितपुर र भक्तपुरका प्रमुख जिल्ला अधिकारीहरुको संयुक्त बैठकले निर्णय गरेको हो ।
कोरोना भाइरसको दोश्रो लहर तीव्र रुपमा फैलिइरहेकोले कम्तीमा १ महिनाको निषेधाज्ञाबाट मात्र फैलावटको चेन ब्रेक हुनसक्ने निश्कर्ष निकाल्दै जारी निषेधाज्ञाको अवधि बढाएर जेठ १३ गतेसम्म पुर्याउने निर्णय भएको छ । अब थप गरिएको निषेधाज्ञा अवधिमा भने विवाह, ब्रतबन्धजस्ता कार्यक्रमहरु घरमै गर्नुपर्ने गरी नयाँ मापदण्ड बनाइएको छ । यसको अर्थ यस्ता कार्यक्रम अब होटल, पार्टी प्यालेसमा गर्न पाइनेछैन । यसअघि निश्चिम मानिसहरु भेला भएर यस्ता धार्मिक तथा सामाजिक कार्यक्रम गर्न छुट थियो ।
जिल्ला प्रशासन कार्यालय काठमाण्डौका अनुसार दैनिक उपभोग्य सामाग्री खरीदका लागि भनी यसअघि निर्धारण गरिएको समयमा भने केही छुट दिइएको छ । अर्थात अब बिहान १० बजेसम्म त्यस्ता सामाग्री खरीदबिक्री गर्न पाइनेछ । यसअघि बिहान ९ बजेसम्म मात्र खरीदबिक्री गर्न पाइने व्यवस्था गरिएको थियो । बिहानको बेलामा कम समय मात्र दिंदा भीडभाड बढेर संक्रमण फैलिने जोखिम देखिएकोले प्रशासनले किनमेलको समयमा एकघण्टा थप गर्ने निर्णय गरेको हो । यो नियम बिहीबारदेखि लागू हुनेछ । प्रशासनले अब भने अत्यावश्यक सेवा दिने बाहेकका अन्य सबै कार्यालयहरु बन्द गराउने निर्णय समेत गरेको छ ।