टोकियो । नेपाली श्रमिकहरु धेरै कार्यरत रहेको जापान र दक्षिण कोरियामा कोरोना संक्रमणको दर उच्च देखिएको छ । पछिल्लो समय चिनमा कोरोना भाईरसबाट संक्रमितको संख्या थपिने क्रम घटिरहँदा अन्य देशमा भने यसबाट संक्रमित बढ्न थालेका छन् । जापानमा संक्रमित ९ जनाको मृत्यु हुँदा अमेरिकामा एकजनाले ज्यान गुमाएका छन् । यसैगरि संक्रमितको संख्या ९ सय ५३ पुगेको छ भने २२ जनाको अवस्था चिन्ताजनक रहेको जापानको स्वास्थ्य मन्त्रालयले जनाएको छ ।
यसैगरि दक्षिण कोरियामा १७ जना संक्रमितले ज्यान गुमाएको पुष्टि हुँदा ईरानमा २ सय बढी ब्यक्तिले ज्यान गुमाएको आशंका गरिएको छ । विश्वभर कोरोना भाईरसको संक्रमण फैलंदो क्रममा रहँदा दक्षिण कोरियामा संक्रमितको संख्या तिब्रगतिमा बढेको छ ।
आईतबार मध्यान्हसम्ममा ३५ सय २६ जनालाई संक्रमण पाईएको कोरियन समाचार संस्थाहरुले उल्लेख गरेका छन् ।
एकदिनमै ३ सय ७६ नयाँ संक्रमित थपिएको सरकारी अधिकारीहरुले बताएका छन् । यसैगरि युरोपीयन देशहरुमा कोरोना भाईरसको संक्रमण फैलंदो क्रममा रहँदा ईटली सबैभन्दा धेरै मारमा परेको छ ।
हालसम्म ईटलीमा १ हजार १ सय २८ व्यक्ति संक्रमित भेटिईसकेका छन् । त्यस मध्ये २९ जनाले ज्यान गुमाएको समाचारमा जनाईएको छ । अष्ट्रेलियामा समेत एकजनाले ज्यान गुमाएका छन् ।
कोरोना भाईरसको संक्रमण फैलिएको चिनमा हालसम्म २८ सय ७० जनाले ज्यान गुमाएका छन् । हाल संक्रमितको संख्या ७९ हजार ८ सय २४ रहेको र ४१ हजार ६ सय २५ जना संक्रमितको स्वास्थ्यमा सुधार आएको चिनियाँ समाचार संस्था सिजिटिएनले उल्लेख गरेको छ । यस बाहेक हगंकगंमा ९५ संक्रमित र २ जनाको मृत्यु भएको छ भने ३३ जनाको स्वास्थ्यमा सुधा भएको छ । मकाउमा १० संक्रमित भेटिएकामा ८ जनाको स्वास्थ्य सुधार तथा ताईवानमा ३९ संक्रमित भेटिंदा एकको मृत्यु र ९ जनाको स्वास्थ्यमा सुधार आएको छ ।