सुनसरी । १६ वर्षीया किशोरीलाई जबरजस्ती करणी गरेको अभियोगमा ईटहरी उपमहानगरपालिका ११ सिमरवना चोक बस्ने १९ वर्षीय त्रिलोचन चौधरी समेत २ जनालाई प्रहरीले पक्राउ गरेको छ । सोही उपमहानगरपालिकास्थित एकान्त बगैँचा घारीमा गत आइतबार राति ती किशोरीलाई ९ जनाले सामुहिकरूपमा जबरजस्ती करणी गरेको भन्ने खबर प्राप्त हुनासाथ इलाका प्रहरी कार्यालय ईटहरीबाट खटिएको प्रहरीले घटनामा संलग्न चौधरी समेत २ जनालाई पक्राउ गरेको हो । घटनामा संलग्न फरार रहेका अन्य व्यक्तिहरूको खोजी गर्नुका साथै यस सम्बन्धमा प्रहरीले थप अनुसन्धान गरिरहेको छ ।

उता, १४ वर्षीया किशोरीलाई जबरजस्ती करणी उद्योग गरेको अभियोगमा उदयपुरको रौतामाई गाउँपालिका ५ हात्तीपाईले बस्ने ३१ वर्षीय अर्जुन विकलाई प्रहरीले पक्राउ गरेको छ । ती किशोरी आफ्नै घरमा सुतिरहेको अवस्थामा विकले कोठाभित्र पसी जवरजस्ती करणी गर्न खोजेको भन्ने खबर प्राप्त हुनासाथ जिल्ला प्रहरी कार्यालय उदयपुरबाट खटिएको प्रहरीले उनलाई पक्राउ गरेको हो ।