एजेन्सी । कोरोना भाइसरको महामारी फैलिँदा चीनमा मृत्यु हुनेको संख्या ८० पुगेको छ । चीनको हुवेई प्रान्तमा मात्र ७६ जनाको मृत्यु भएको छ भने अन्य प्रान्तका विभिन्न शहरमा थप ४ जनाको मृत्यु भएको चिनियाँ स्वास्थ्य अधिकारीहरुले जनाएका छन् ।
२ हजार ७ सय ४४ मानिस कोरोनाको संक्रमणपछि अस्पतालमा उपचारारत छन् भने झण्डै ६ हजार मानिसलाई संक्रमण भएको आशंका गरिएको छ । ३० हजार मानिसलाई प्रत्यक्ष निगरानीमा राखिएको चिनियाँ अधिकारीहरुलाई उदृत गर्दै बीबीसीले जनाएको छ । मानिसबाट मानिसमा सर्ने यो भाइरस सबै भन्दा घातक मानिएको छ ।
कोरोनाको सुरुवाती बिन्दु मानिएको चीनको बुहानमा सबै सार्वजनिक यातायात बन्द गरिए पनि संक्रमण रोकिएको छैन । बरु अझ फैलदै गएकोमा चीन सरकार चिन्तित बनेको हो ।
बीबीसीका अनुसार कोरोनाले महामारीको रुप लिँदै गएको तथा संसारभर फैलदै गएको छ । अहिलेसम्म दुई दर्जनभन्दा बढी देशमा कोरोना देखिएपछि संसारभर सतर्कता अपनाइएको छ ।
स्वास–प्रस्वासमा समस्या हुने तथा उच्च ज्वरो आउनेसहितका लक्ष्यण देखिँदै मानिसको मृत्यु नै हुन थालेपछि कोरोनाकाबिरुद्ध संसारभर सतर्कता अपनाइएको हो ।