काठमाडौं । फागुन २३ गतेबाट सुरु हुने दोस्रो प्राथमिकतामा परेका व्यक्तिहरुलाई खोप लगाउने अभियानमा काठमाडौं महानगरपालिकामा १५ वटा खोप केन्द्र तोकिएको छ । माघ १४ गतेदेखि सुरु भएको खोप अभियान अन्तर्गत फागुन २३ गतेबाट दोस्रो चरणको कार्यक्रम सञ्चालन हुँदैछ ।

उक्त खोप कार्यक्रममा ५५ वर्षभन्दा माथिमा नागरिक, महाविद्यालय,विद्यालयका प्राध्यापक, शिक्षक तथा कर्मचारीहरु, सार्वजनिक यातायातका चालक, सह–चालकहरुलाई खोप दिइनेछ । उक्त कार्यक्रम फागुन २८ गतेसम्म चल्नेछ । यसअघि स्वास्थ्यकर्मी, सफाईकर्मी, शव व्यवस्थापक, एम्बुलेन्स चालक, पत्रकार, सरकारी कर्मचारीहरु, बैंकका कर्मचारी, कैदी, बृद्धाश्रममा रहेका व्यक्ति र उनीहरुको हेरचाहमा खटिएका लगायतलाई खोप दिइसकिएको छ । आज बानेश्वरस्थित सिभिल अस्पतालमा सभामुख,मन्त्री तथा शीर्षनेताहरुले खोप लगाइसक्नुभएको छ ।

नेपालमा हालसम्म २ वटा खोपले आपत्कालिन प्रयोगको अनुमति पाइसकेको छ । भारतमा निर्मित अक्सफोर्ड तथा एस्ट्रेजेनेकाको कोभिशिल्ड, र चीनमा बनेको सिनोफर्मको भेरोसेल खोपले नेपालमा अनुमति पाइसकेको छ यद्यपी अहिलेसम्म कोभिशिल्ड खोप मात्रै प्रयोगमा ल्याइएको छ । पहिलो चरणमा करिव ४ लाख ३० हजार जनाले खोप लगाएका थिए ।