काठमाडौँ । रगताम्मे अवस्थामा घरमा भेटिएकी पूर्वसचिव अर्जुनकुमार कार्कीकी श्रीमती मुना कार्कीको उपचारको क्रममा मृत्यु भएको छ । सानेपास्थित स्टार अस्पतालमा उपचारका क्रममा उनको मृत्यु भएको महानगरीय प्रहरी प्रभाग सानेपाले जनाएको छ । सोमबार बिहान सानेपास्थित निवासमा रगतले लतपतिएर अचेत अवस्थामा भेटिएकी उनलाई उपचारका लागि तत्काल स्टार अस्पताल लगिएको थियो ।

अचेत अवस्थामा फेला परेकी उनीसँगै कामदार विजय चौधरी मृत फेला परेका थिए । उनले भने आत्महत्या गरेको हुनसक्ने प्रहरीको प्रारम्भिक अनुमान रहेको छ । उनको शव झुण्डिएको अवस्थामा फेला परेको थियो ।
कार्कीका एक छोरा र दुई छोरी रहेका छन् । दुवै छोरी बाहिर रहेका छन् भने १२ वर्षका छोरा स्कूलमा अध्ययनरत छन् । घटना घटेको समय छोरालाई लिएर अर्की कामदार पनि घरबाहिर रहेकी थिइन् ।