काठमाडौं । भाइरल हुने नाममा सामाजिक मर्यादा भुलेका केही युटुवका कारण सिंगो सञ्चार क्षेत्र बदनाम भएको छ । उपत्यका प्रवेश गर्ने प्रमुख नाका थानकोट नागढुंगामा खटिएका स्वास्थ्यकर्मीलाई दुर्व्यवहार गरेको आरोपमा चन्द्रागिरिका उत्तम कार्की पक्राउ परेका छन् । काठमाडौं प्रहरी परिसर, टेकुका प्रमुख एसएसपी श्यामलाल ज्ञवालीका अनुसार पक्राउ परेका कार्कीविरूद्ध अभद्र व्यवहारको कसूरसम्बन्धी अभियोगमा कारबाही प्रक्रिया अघि बढाइने छ । कोरोना संक्रमणको जोखिम नियन्त्रणका लागि खटिएको भन्दै शुक्रबार दिउँसो उनीलगायतले वागमती प्रदेशका जनस्वास्थ्य प्रयोगशालाका निर्देशक डा. नारायण कार्कीलाई दुर्व्यवहार गरेका थिए । उनीहरुले प्रहरीकै अगाडि कार्कीको खानतलासी पनि लिएका थिए । जसको चौतर्फी विरोध भइरहेको छ । सामाजिक सञ्जालमा चर्को आलोचना भए पछि कार्कीले सामाजिक सञ्जालमार्फत् माफी मागेका छन्। कोरानाको कहरसँग अग्रपत्तिंमा रहेर लडिरहेका चिकित्सकहरुमाथि मोवाइल तेर्साएर अनावश्यक सोधपुछ र हप्कीदप्की गर्ने छुट उनलाई कसले दियो ? त्यो पनि प्रहरीहरुकै आँखा अगाडि ? नेपाल प्रहरी, सशस्त्र प्रहरीकै सामु नागढुंगामा एक हुल ब्यक्तिले कानुन हातमा लिएर स्वास्थ्यकर्मीमाथि अनावश्यक केरकार गरेको भिडियो अहिले भाइरल भइरहेको छ ।