काठमाडौं । छिमेकी मुलुक चीनका राष्ट्रपति सी जिनपिङले दुई दिने मैत्रीपूर्ण नेपाल भ्रमणको समापनसँगै चीनका व्यापारीहरु नेपालमा लगानी गर्न इच्छुक देखिन थालेका छन् । राष्ट्रपतिको भ्रमणले नेपालमा चीनको लगानी बढ्दै जाने अपेक्षा राखिएको बेला चीनको वातावरणमैत्री निर्माण सामाग्री उत्पादन गर्ने एउटा ठूलो कम्पनीले नेपालमा लगानी गर्न इच्छा जनाएको छ । चीनस्थित सानडोग टाइक्सिग मेशिनरी कम्पनी लिमिटेडले नेपालमा यस क्षेत्रमा लगानी गर्न इच्छा प्रकट गरेको हो ।
कम्पनीका अध्यक्ष यान पिग झागको नेतृत्वमा नेपाल आएको सात सदस्यीय टोलीले नेपालमा लगानीको वातावरण भए अर्को वर्षदेखि नै लगानी थाल्ने जनाए । अध्यक्ष झांगले नेपालमा आफूहरुले वातावरणीय निर्माण सामाग्री उत्पादन गर्ने मेशिनको उत्पादनमा लगानी गर्ने इच्छा रहेको बताए । विकाशको मूल आधार नै निर्माण सामाग्री रहेकोले चीनमा जस्तै हामी नेपालमा पनि यही क्षेत्रमा लगानी गर्न चाहन्छौं, उनले थपे, त्यसो त हाम्रो कृषि क्षेत्रमा पनि लगानी छ, त्यसकारण हुन त हामी दुवै क्षेत्रमै लगानी गर्न चाहन्छौं । १५ मिलियन डलर लगानी रहेको कम्पनीले उत्पादन गरेका मेशिनरी सामानहरु भारत, बंगलादेश, नेपाल, टुजिकिस्टानलगायतका १९ वटा देशहरुमा निर्यात भइरहेको जनाइएको छ । कम्पनीले विशेष गरेर वातावरणमैत्री निर्माण सामाग्री उत्पादन गर्ने र कृषिमा लगानी रहेको जनाइएको छ । चीनमा मुख्य कारखाना रहेको कम्पनीको लगानी चीन बाहिरको देशहरुमा रहेको जनाइएको छ ।