काठमाडौं । चीनको वुहान प्रान्तबाट नेपालीलाई उद्दार गरेर ल्याएको नेपाल एयरलाइन्सको विमान ४८ घण्टा नउड्ने भएको छ । नेपालीहरुलाई लिन गएको प्लेनका सिटलाई प्लाष्टिकले कभर गरिएको थियो । त्रिभुवन विमानस्थलमा विहान सवा तीन बजे अवतरण गरेको विमान स्वास्थ्य सतर्कताका लागि ४८ घण्टा नउडाइने भएको हो । विश्व स्वास्थ्य संगठको मापदण्डअनुरुप नै विमानलाई ४८ घण्टा निलम्बनमा राखिएको हो । यो अवधिमा विमानलाई मेडिकल्ली गर्नुपर्ने ट्रिटमेन्ट गरिने बताइएको छ । नेपाल एयरलाइन्सको वाइडबडीले मुख्य रुपमा भारतको दिल्ली, कतारको दोहा, जापान र दुबईमा उडान भरिरहेको छ ।

बस पनि ४८ घण्टे क्वारेन्टाइनमा
चीनको वुहान शहरबाट उद्धार गरिएका नेपालीलाई विमानस्थलदेखि खरिपाटीसम्म लैजान प्रयोग गरिएको बसलाई ४८ घण्टा क्वारेन्टाइनमा राखिएको छ । बसबाट भाइरस फैलन सक्ने भन्दै उनीहरुले प्रयोग गरेको सात वटा बसलाई क्वारेन्टाइनमा राखिएको हो । तर बस चालकलाई भने क्यारेन्टाइनमा राखिएको छैन । चालक सबैले सुरक्षित तरिका अपनाएको कारण डाक्टरको सल्लाह अनुसार क्यारेन्टाइनमा नराखिएको संस्कृति, पर्यटन तथा नागरिक उडड्यन मन्त्रालयले जनाएको छ। मन्त्रालयका सहसचिव सुरेश आचार्यका अनुसार बसका चालकहरु चीन नगएको र उनीहरुले विमानस्थल भित्र प्रवेश गर्नु अघिनै सुरक्षित तरिका अपनाएको कारण क्यारेन्टाइनमा नराखिएको हो ।