जापान । एक जना व्यक्तिले आफू आत्महत्या गरेर संसार छाड्नै लाग्दा पनि तीन जना व्यक्तिलाई घाइते बनाएका छन् । जापान कावासाकी खानागावामा एक्सप्रेस रेलको लिगमा आत्महत्या गर्न हामफाल्ने एक व्यक्तिले तीनजना यात्रुलाई रेलको लिगमा लडाएर घाईते बनाएका हुन् । जापानको केईयो सागामिहारा लाईनको रेल लिगमा भएको उक्त घटनामा आत्महत्या गर्न लिगमा फालहाल्ने व्यक्तिको घटनास्थलमै निधन भएको थियो । सेन्केई सिम्बुनमा प्रकाशित समाचार अनुसार आत्महत्या गरेका व्यक्तिले रेलकुर्न बसेका यात्रुलाई ठेलेर रेलको लिगमा खसालिएर आफुपनि हामफालेका थिए । उक्त घटनामा ४० बर्षका एक व्यक्तिको तिघ्राको भाग भाँचिन पुगेको छ । यस्तै २० बर्षका युवाको खुट्टामा चोट लागेको तथा ६० बर्षिय महिलाको अनुहारमा घाउ लागेको छ ।
घटनामा रेल आकस्मिक रुपमा रोक्दा रेलका २० बर्षिय चालकको रेलको अघिल्लो भागमा टाउको ठोक्किन पुग्दा अनुहारमा चोट लागेको छ । सागामिहारामा बस्दै आएका ती व्यक्तिको आत्महत्याको कारण थाहा हुन नसकेको उनले लेखेको कुनै सुसाइड नोट पनि अहिलेसम्म फेला नपरेको प्रहरीले बताएको छ । उक्त घटनाका कारण सो लाईनमा चल्ने रेलसेवा १ घण्टा अवरुद्ध हुन पुगेको जेआर रेल कम्पनीले जनाएको छ । (एजेन्सी)