काठमाडौं । चिकित्सा शिक्षा क्षेत्रको विकृतिविरुद्ध निरन्तर अनसन बस्दै आएका वरिष्ठ चिकित्सक डा. गोविन्द केसीले उमेरहदका कारण अवकाश पाएको एक हप्ता बित्न नपाउँदै चिकित्सा शिक्षा आयोगले एमबीबीएस अध्ययनको शूल्क बढाउने घोषणा गरेको छ । नयाँ शुल्कअनुसार अब काठमाडौं उपत्यकाभित्र ४० लाख २३ हजार २५० रुपैयाँ र उपत्यकाबाहिर ४४ लाख ३६ हजार २५ रुपैयाँ शुल्क कायम भएको छ ।
यसअघि उपत्यकाभित्र ३८ लाख ५० हजार र उपत्यकाबाहिर ४२ लाख ४५ हजार थियो । आर्थिक वर्ष २०७५ मा मुद्रास्फिति ४।५ प्रतिशत रहेको नेपाल राष्ट्र बैंकको प्रतिवेदनका आधारमा नयाँ शूल्क निर्धारण गरिएको आयोगले बताएको छ ।
यस्तै बीडीएस अध्ययन शूल्क २० लाख १९ हजार ५८० रुपैयाँ तोकिएको छ । यसअघि १९ लाख ३२ हजार ६१२ रुपैयाँ थियो । यो शुल्कको पहिलो एक तिहाई रकम पहिलो वर्ष र बाँकी बार्षिक रुपमा किस्ताबन्दीमा लिइनेछ । आयोगले एमबीबीएस अध्ययन शुल्कको एक तिहाई उपत्यकाभित्र १३ लाख ४१ हजार ८५ र बाहिर १४ लाख ७८ हजार ६७५ रुपैयाँ विश्वविद्यालयमा जम्मा गरी सबन्धित कलेजमा पठाउने व्यवस्था मिलाउन पनि निर्देशन दिएको छ ।
