आजभोलि नगदको कारोबार साँघुरिँदै गएको छ । वित्तीय कारोबारमा प्रविधिको प्रयोगले नगद बोक्नु पर्ने अवस्था कम हुँदै गएको छ । तर कतिपय अवस्थामा नगदै नबोकी नहुने पनि हुन्छ । यसरी नगद बोक्नु पर्दाको जोखिम बहन गर्ने बीमा हो मार्गस्थ नगद बीमा ।
हरेक क्षेत्रको जोखिम बहन गर्ने भनेको बीमाले नै हो । आजको समयमा नेपालमा मात्रै होइन सारा विश्वमा आइपर्ने सबैखाले जोखिम बहन बीमाले नै गरेको छ ।
हाम्रो समाजले अझै राम्रोसँग बीमालाई बुझ्न सकेको छैन । बुझेकाहरुले यसको सदुपयोग पनि गरिरहेका छन् । यसै सन्दर्भमा आम जनमानसमा कम जानकारी भएको निर्जिवन बीमाको एउटा पक्ष हो मार्गस्थ नगद बीमा ।
तर धेरै चलनचल्तीमा नरहेको यो बीमा संस्थागत रुपमा कार्यरत कर्मचारीहरुले गर्ने नगद कारोबारको ओसारपसार गर्दा कुनै दुर्घटना, चोरी, लुटपाट भएमा यस बीमाले सुरक्षा प्रदान गर्दछ । यस बीमाको महत्व वित्तीय संस्थाहरुलाई बढी हुँदा हुँदै पनि ज्ञान र प्रचारप्रसारको कमीको कारणले कम चल्तीमा छ ।
बैंकका कर्मचारी, बीमा कम्पनीमा बीमा शुल्कको नगद निक्षेप वा जम्मा गर्न सुरक्षाकर्मीसहित जान्छन् भने सहकारी, बीमा एजेन्ट लगायतका वित्तीय कारोबार गर्ने संस्थाका प्रतिनिधिहरु दैनिक नगदको कारोबार गर्न बाध्य हुन्छन् ।
यस्तो अवस्थामा कुनै घटना घटेमा थोरै तलबमा काम गर्ने कर्मचारीहरुलाई ठूलो आर्थिक बोझ पर्नसक्छ । मार्गस्थ नगद बीमा गरेको खण्डमा बीमकले बीमाङ्क रकम वा त्यहाँ भएको आर्थिक क्षतिको पूर्ति गर्दछ । यसमा परम सद्विश्वासको सिद्धान्त लागू हुन्छ । किनकि नक्कली घट्ना सिर्जना गरेर दाबी भुक्तानी नपरोस् भन्ने यस सिद्धान्तको उद्देश्य हो ।