काठमाडौँ । २० वटा वाणिज्य बैंकहरूले आर्थिक वर्ष २०७९–८० को वित्तीय विवरण सार्वजनिक गरेका छन् । गत असार मसान्तसम्म बैंकहरूले गरेको वित्तीय कारोबार निक्षेप सङ्कलन, कर्जा लगानी र विविध कारोबारबाट प्राप्त प्रतिफलका आधारमा आर्थिक वर्षभित्र बैंकहरूले कूल ७० अर्ब १७ करोड ५८ लाख १२ हजार रुपैयाँ खुद नाफा कमाएका हुन् । अघिल्लो आर्थिक वर्षको तुलनामा बैंकहरूले यो वर्ष २४.९३ प्रतिशतको नाफा वृद्धि गरेका हुन् । आर्थिक वर्ष २०७८र७९ मा बैंकहरूले कूल ५६ अर्ब १७ करोड २३ लाख ५६ हजार रुपैयाँ नाफा कमाएका थिए । कठिन आर्थिक स्थितिका बाबजुद समीक्षा वर्षमा बैंकहरूको कर्जा लगानी र असुली समेत घट्दै गर्दा पनि यस्तो नाफालाई उत्साहजनक नै मान्न सकिन्छ । तथापि, बैंकहरूको खराब कर्जा (एनपीएल) को दर केही बढ्दा बैंकहरू समस्यामा छन् । नाफाको अधिक प्रतिशत खराब कर्जाको सुरक्षणका लागि प्रोभिजनिङ गर्नुपर्दा बैंकहरूको वितरणयोग्य नाफामा भने केही सङ्कुचन आएको छ ।
व्यवसायका हिसाबले दुई ठुला बैंक नबिल र ग्लोबल आईएमई बीच नै तीव्र प्रतिस्पर्धा देखिएको छ । आर्थिक वर्षको अन्तसम्ममा ७ अर्ब ५२ करोड ७१ लाख रुपैयाँ बढी नाफा कमाएर शीर्ष स्थानमा रहन सफल नबिल बैंकलाई ग्लोबल आईएमई बैंकले पच्छ्याइरहेको छ । समीक्षा अवधिमा ग्लोबल आईएमई बैंकले ७ अर्ब २५ करोड ३४ लाख ५५ हजार रुपैयाँ खुद नाफा आर्जन गरेको छ । गत वर्ष ४ अर्ब ९५ करोड ९२ लाख २५ हजार रुपैयाँ नाफा कमाएको ग्लोबल आईएमई बैंकलाई यस वर्ष नबिल बैंकले ७६।८६ प्रतिशत अर्थात् ३ अर्ब २७ करोड ११ लाख २५ हजार रुपैयाँले नाफा वृद्धि गर्दै ग्लोबल आईएमई बैंकलाई उछिनेको हो । आर्थिक वर्ष २०७८र७९ मा नबिल बैंकले जम्मा ४ अर्ब २५ करोड ६० लाख २४ हजार रुपैयाँ नाफा कमाएको थियो ।
यस्तै, यस वर्ष पनि आफ्नो तेस्रो र चौथो स्थान कायम गर्दै राष्ट्रिय वाणिज्य बैंक र एनआईसी एशिया बैंकले क्रमशः ४ अर्ब ९१ करोड ७१ लाख ९९ हजार रुपैयाँ र ४ अर्ब ६५ करोड १३ लाख ३८ हजार रुपैयाँ नाफा कमाएका छन् । अघिल्लो आर्थिक वर्ष वाणिज्य बैंकले ४ अर्ब २९ करोड २८ लाख रुपैयाँ नाफा कमाउँदा एनआईसी एशिया बैंकले ४ अर्ब २१ करोड ४९ लाख रुपैयाँ खुद नाफा कमाएको थियो । अघिल्लो वर्षको तुलनामा बैंकहरूले क्रमशः १४।५४ प्रतिशत र १०।३५ प्रतिशतले नाफा वृद्धि गरेका हुन् ।
नेपाल इन्भेष्टमेन्ट बैंकले आर्थिक वर्ष २०७९–८० मा ४ अर्ब २९ करोड ६६ लाख २२ हजार रुपैयाँ खुद नाफा कमाएको छ । अघिल्लो वर्ष ३ अर्ब ७९ करोड ७६ लाख ४ हजार रुपैयाँ नाफा कमाएको बैंकले यो वर्ष १३.१४ प्रतिशतले नाफा बढाएको हो ।
स्ट्यान्र्ड चार्टर्ड बैंकले ५६.२७ प्रतिशतले नाफामा वृद्धि गरेको छ । अघिल्लो वर्ष जम्मा २ अर्ब २५ करोड ५९ लाख रुपैयाँ बराबरको मात्र नाफा आर्जन गरेको बैंकले यो वर्ष ३ अर्ब ५२ करोड ५४ लाख रुपैयाँ नाफा कमाउन सफल भएको छ । यस्तै, नेपाल बैंक, एनएमबी, एभरेस्ट, हिमालयन, सिद्धार्थ, कृषि विकास, प्रभु, सानिमा, लक्ष्मी–सनराइज, नेपाल एसबीआई, सिटिजन्स् र माछापुच्छ्रे बैंकले अघिल्लो वर्षको तुलनामा आकर्षक नाफा वृद्धि गर्दै १ अर्ब ८५ करोड रुपैयाँदेखि ३ अर्ब ४१ करोड रुपैयाँसम्म नाफा कमाएका छन् ।
