काठमाडौं । नबिल बैंकले ऋणपत्र निष्कामशन गर्न नेपाल धितोपत्र बोर्डबाट अनुमति पाएको छ । नबिल बैंकले ऋणपत्र निष्काशनको लागि माघ ६ गते सोमबार अनुमति पाएको हो । नबिल बैंकले वार्षिक दश प्रतिशत ब्याजदरमा सात वर्ष अवधिको २ अर्ब रुपैयाँ बराबरको ऋणपत्र निष्काशन गर्न अनुमति पाएको छ । ऋणपत्र निष्काशन गर्न बैंकले लक्ष्मी क्यापिटल मार्केट लिमिटेडलाई निष्काशन तथा बिक्री प्रबन्धक चयन गरेको छ । बैंकले प्रति कित्ता एक हजार रुपैयाँका अंकित दरका २० लाख युनिट ऋणपत्र बिक्री गर्नेछ । निष्काशित ऋणपत्रमध्ये ४० प्रतिशत अर्थात ८० करोड बराबरको ८ लाख युनिट सर्वसाधारणलाई र बाँकी ६० प्रतिशत एक अर्ब २० करोड बराबरको १२ लाख युनिट ठूला तथा संस्थागत लगानीकर्ताहरूलाई व्यक्तिगत तबरबाट बिक्री गरिने बैंकले जनाएको छ ।