सराेज अधिकारी
नेपाली सेयर बजारले करेक्सनको बाटो समातेको छ । सेयर बजारमा लगानी गर्दा नाफै नाफा हुन्छ भन्ने मानसिकता बोकेका कतिपय लगानीकर्ताको लागि यो सिक्ने अबसर पनि हो । कोभिड–१९ का कारण भएको लकडाउन पश्चात् छोटो समयमा नै झण्डै १२०० को हाराहारीमा रहेको नेप्सेमा उल्लेख्य सुधार सहित नेप्से परिसूचकाङ्क २६४१.०३ को बिन्दूमा उक्लिएको हो ।
नेप्सेमा सतप्रतिशतभन्दा बढी बढोत्तरी पश्चात् केही करेक्सन हुन स्वभाविक नै हो । करेक्सनका लागि कुनै समाचारको पर्खाइमा रहेको बजार हाल राजनीतिक क्षेत्रमा देखिएको अन्यौल र ब्याजदरमा बढोत्तरीको खबरलाई आधार बनाएर ओरालो लाग्न सुरु गरेको हो । नेप्सेमा यस्तो करेक्सन केही महिना अझै रहन सक्ने विश्लेषकहरुको भनाईप्रति सहमत हुन सकिने आधारहरु थुप्रै छन् ।
तर समग्रमा नेपाली सेयर बजारमा बुलिस यात्रा नै सकिएको भने अवश्य पनि होइन । यस्तो करेक्सनको बेला राम्रा र भविष्यमा उचित प्रतिफल दिन सक्ने कम्पनीहरुमा लगानी गर्ने ठूलो अबसर पनि हो । त्यसैको खोजिमा लगानीकर्ताले आफूलाई लगाउनु पर्ने बेला हो यो । नेप्सेमा भएको करेक्सन ठूलो भने हुने देखिदैन उकालो लागेको नेप्सेका यात्रामा केही विराम र करेक्सन आए तापनि दुई हजारको बिन्दूबाट नेप्से तल आउने कुनै दरिलो आधारहरु भने देखिदैन ।
नेप्सेमा आएको करेक्सनका बेला पनि कतिपय कम्पनीहरुको सेयर मूल्यमा खासै गिरावट आएको छैन भने कतिपय भविष्यमा खासै प्रतिफल दिन नसक्ने कम्पनीहरुको बजार मूल्य अझै उच्च रहेको छ । तसर्थ समग्रमा नेप्सेमा आएको यस करेक्सनका बेला आफूसँग भएको कुन सेयर बेच्ने वा कस्तो कम्पनीमा लगानी गर्ने भन्ने कुराको निर्णय लिने उपयुक्त अबसर पनि हो अहिले ।
नेपाली सेयर बजारमा विगतमा पनि फागुन चैत महिनामा धेरै कम्पनीहरुको बोनस सेयर नगद लाभांश बाढिसकेको अवस्था हुने भएकोले बजारमा करेक्सन आउने गरेको इतिहास छ । अघिल्लो बर्ष त झन नेप्सेमा वियरिस ट्रेड कायम नै थियो त्यसमाथि पनि कोभिडका कारण लकडाउन भए पछि भने नेप्सेमा बढोत्तरीको कुरै भएन ।
कतिपय लगानीकर्ताले छोटो समयमा नै नाफा बुक गर्ने रणनीति लिदा बजारमा सेयरका आपूर्ति उच्च हुनु र त्यसको अनुपातमा खरिद कर्ता नहुनुले हप्ता दिनमा नेप्सेमा करिब १६७ अङ्कको गिरावट आइसकेको छ । अझ कति गिरावट आउने हो भन्ने कुरा भने लगानीकर्ताको मनोबल, अगामी राजनीतिक परिदृश्य र तरलताको अभावमा ब्याजदरमा आउने परिवर्तन (बढोत्तरी) नै प्रमुख कारक तत्व हुने निश्चित छ ।
सेयर बजार र ब्याजदरको सधै उल्टो सम्वन्ध रहने हुनाले कोभिडको न्यूनिकरण पश्चात् बजारमा लगानीको सम्भावनाहरु बढ्नुले तरलताको अभावमा हुने हो र सेयर कर्जा समेत महङ्गिने हो भने त्यसले सेयर बजारमा केही समय नकारात्मक प्रभाव पार्ने निश्चित छ ।
आइतबार नेप्सेमा झण्डै ८० अङ्कको गिरावट सहित नेप्सेमा २४७४.३९ ओर्लिएको छ । सेयर बजारमा लगानी गर्नेले धैर्यता गुमाउनु हुँदैन । आफूले लगानी गरेको कम्पनीको प्रगति सही दिशामा छ भने प्रतिफल अवश्य पनि राम्रो हुन्छ भन्ने विश्वासका साथ बजारमा टिकिरहनेले कमाउने हो ।
यस्तो करेक्सनमा टिक्ने, राम्रो कम्पनीमा आफ्नो लगानी बढाउने अबसरको रुपमा लगानीकर्ताले लिदा राम्रो हुन्छ । नेपाली सेयर बजारले अझै चक्रका हिसाबले आगामी करिब तीन बर्ष ढुक्क भएर लगानी गर्ने वातावरण विद्यमान नै देखिन्छ ।
