काठमाण्डौ । नेपाल फाइनान्स लिमिटेडको खुद ब्याज आम्दानी बढेसँगै नाफामा सुधार आएको छ । कम्पनीले चालु आर्थिक वर्ष २०८१–८२ को दोस्रो त्रैमाससम्ममा २ करोड ५ लाख रुपैयाँ खुद नाफा कमाएको छ । यो रकम अघिल्लो आवको सोही अवधिमा कम्पनीले कमाएको ८ लाख १२ हजारको तुलनामा २ हजार ४२४ प्रतिशतले बढी हो । समीक्षा अवधिसम्म कम्पनीको खुद ब्याज आम्दानी पनि १२.१५ प्रतिशतले बढेर भएर ५ करोड २२ लाख रुपैयाँ पुगेको छ । कम्पनीको खुद सञ्चालन आम्दानी ५ करोड ५४ लाखबाट बढेर ८ करोड ९५ लाख पुगेको छ । यस्तै कम्पनीको सञ्चालन नाफा पनि २ करोड ९२ लाख रुपैयाँ पुगेको छ। कम्पनीको कुल शुल्क तथा कमिशन आम्दानी घटेको छ । कम्पनीले ५६ लाख ६१ हजार रुपैयाँबराबरको कुल शुल्क तथा सञ्चालन आम्दानी गरेको छ । जुन अघिल्लो आवको तुलनामा ३.७८ प्रतिशतले कम हो । समीक्षा अवधिसम्म कम्पनीले इम्पेयरमेन्ट चार्जका लागि २ करोड ६१ लाख रुपैयाँ छुट्टाएको छ । कम्पनीको वितरणयोग्य मुनाफा भने २६ करोड १९ लाख रुपैयाँले ऋणात्मक अवस्थामा रहेको छ । कम्पनीको रिटेन्ड अर्निङ २६ करोड १९ लाख रुपैयाँले ऋणात्मक रहेकोमा रिजर्भको आकार भने १०.८३ प्रतिशतले बढेर ४८ करोड १३ लाख रुपैयाँबराबर पुगेको छ । यो अवधिसम्म ३ अर्ब ५७ करोड रुपैयाँ निक्षेप संकलन गरेको कम्पनीले २ अर्ब १३ करोड रुपैयाँबराबरको कर्जा प्रवाह गरेको छ । कम्पनीको खराब कर्जा अनुपात घटेको छ । अघिल्लो आवमा १०.५२ प्रतिशत रहेको खराब कर्जा अनुपात घटेर १०.४६ प्रतिशतमा झरेको छ ।