काठमाडौं । आगामी वर्षभित्र नेपालमा पानी जहाज सञ्चालन गर्नका लागि आवश्यक कानुन निर्माण र भौतिक पूर्वाधारको तयारीमा जुटेको पानीजहाज कार्यालयले बराहादेखि चतरा (कोशि) र कालिगण्डकी नदीमा पानी जहाज सञ्चालनका लागि रुट सुधार तथा सफाई गर्ने भएको छ । ती क्षेत्रमा अहिले सानातिना बोट तथा स्टिमर सञ्चालन भइरहेका र ती क्षेत्रमा ढुंगा, बालुवा लगायतका कारणले सञ्चालनमा अवरोध आउन सक्ने कुरालाई मध्यनजर गर्दैै पानी जहाज कार्यालयले ती क्षेत्रको सम्भाव्यता अध्ययन गर्ने तयारी गरेको र अध्ययनपछि रुट सुधार गर्ने कार्यालयका कामु रजिष्टार बिपिन राजभण्डारीले बताउनुभयो । कोशीको बराहा, चतराको बीच क्षेत्रमा र कालिगण्डकीको राम्दीमा सम्भाव्यता अध्ययन गर्ने कार्य अघि बढाइने उहाँको भनाई थियो । राजभण्डारीका अनुसार, नेपालमा पानी जहाज सञ्चालनका लागि निर्माण गर्न लागिएको ऐनलाई अन्तिम रुप दिने तयारी भइरहेको र एक साताभित्रै त्यसलाई अन्तिम रुप दिई मन्त्रालयमा उक्त ऐन पेश गरिने छ । मन्त्रालयले उक्त ऐनलाई आगामी संसदको अधिवेशनमा पेश गर्ने तयारी गरेको छ ।