गोरखा । सारा हिन्दूहरुको आस्थाको केन्द्र, त्यही केन्द्रका पुजारी झनै पूजनीय र भगवानका प्रतिनिधि । उनलाई को बाट असुरक्षा होला । त्यो पनि ठिकै छ ल सुरक्षाका हिसावले हतियार राख्ने इच्छा भयो होला । तर त्यति पूजनीय व्यक्तिले व्यक्तिगत सुरक्षाका लागि लिएको हतियार राज्यले प्रतिबन्ध लगाएका वन्यजन्तुको शिकारमा प्रयोग गर्नु कतिसम्म न्यायोचित होला ? गोरखाको मनकामना मन्दिरका मूल पुजारी इन्सान थापा मगरले सुरक्षाका लागि भन्दै लिएको बन्दुकले पशुपन्क्षीको शिकार गर्ने गरेको स्थानीयवासीले बताएका छन् । वैशाख ५ गते राति शहीद लखन गाउँपालिका ४ बक्राङको ढोडेनी जंगलमा स्थानीयले उनलाई बन्दुकसहित नियन्त्रणमा लिएका थिए । शिकार खेल्नकै लागि उनी त्यहाँ गएको स्थानीयको दाबी छ । पुजारी मगरसँग इजाजतसहितका तीनवटा हतियार छन् । त्यसमा एकनाले भरुवा बन्दुक, २२ बोरको राइफल र १२ बोरको बन्दुक रहेको छ । दुईवटा बन्दुक उनले शुक्रबार प्रहरीलाई बुझाएका छन् ।स्थानीयवासीले चाहिँ सुरक्षाका लागि लिएको बन्दुक मगरले शिकार खेल्न प्रयोग गर्दै आएको दावी गरेका छन् । मन्दिरको कामबाट फुर्सद पाउने वित्तिकै शिकार खेल्न हिँडिहाल्ने गरेको स्थानीयको आरोप छ । पुजारी मगरले कालिज, दुम्सी, तित्रा, मृग लगायतका जनावरको शिकार गर्ने गरेको स्थानीयबासी बताउँछन् ।