नयाँदिल्ली । जम्मू–कश्मीरको लाइन अफ कन्ट्रोल क्षेत्र नजिक भएको गोलीबारीमा परी भारतीय सेनामा कार्यरत एक जना नेपाली गोर्खा सैनिकको मृत्यु भएको छ । भारतीय सेनाले युद्धविरामलाई उल्लंघन गर्दै सोमबार बिहान करिब साढे पाँच बजेतिर पाकिस्तानतर्फबाट भएको गोलीबारीमा परेर जम्मू–कश्मीरको नौसेरा क्षेत्रको रजौरी जिल्लामा खटिएका हवलदार दीपक कार्कीको मृत्यु भएको हो । गोलीबारीमा गम्भीर घाइते भएका कार्कीको उपचारको क्रममा मृत्यु भएको हो । ३७ वर्षीय कार्की गुल्मी जिल्ला निवासी भएको भएको बताइएको छ । भारतीय सेनाको ड्युटीमै रहेका बेला नेपाली नागरिकको मृत्यु भएको पछिल्लो घटना पहिलो भने होइन । गत वर्ष मंसिरमा पनि जम्मू–कश्मीरमै खटिएका गोरखाको रिप गाउँका २५ वर्षीय अर्जुन थापामगरले पनि दोहारो गोलीबारीमा परेर ज्यान गुमाएका थिए । त्यसैगरी जेठ २०७४ मा पनि भारतीय सेनाको गोर्खा रेजिमेन्टमा कार्यरत तीन जना नेपालीको जम्मू–कश्मीरमै भएको आतंकवादी हमलामा मृत्यु भएको थियो । उक्त घटनामा कास्कीका गिरीश गुरुङ, गुल्मीका डम्बरबहादुर पुन र पर्वतका रविन शर्माको ज्यान गएको थियो । यसैगरी भदौ २०७४ मा पनि लाइन अफ कन्ट्रोल क्षेत्र नजिक भएको गोलीबारीमा परेर भारतीय सेनामा कार्यरत अर्का एक जना नेपाली मूलका ३६ वर्षीय सन्दीप थापाको मृत्यु भएको थियो ।