काठमाडौं । भारतीय आयल कर्पोरेसन (आईओसी)ले नेपाल आयल निगमलाई पठाएको नयाँ मूल्यसूचीमा पेट्रोलियम पदार्थको मूल्य दोहोरो अङ्कले बढेर आएपछि नेपालमा पनि इन्धनको मूल्य बढ्ने लगभग निश्चित भएको छ।
अन्तर्राष्ट्रिय बजारमा कच्चा तेलको मूल्य वृद्धि भएपछि आईओसीले हरेक १५ दिनमा पठाउने नयाँ मूल्यसूचीमा पेट्रोलियम पदार्थको मूल्य प्रतिलिटर १० रुपैयाँभन्दा बढीले बढाएर पठाएको निगम स्रोतले जनाएको छ। यससँगै निगमले पनि मूल्य समायोजनको तयारी थालेको छ।
हालको स्वचालित मूल्य प्रणालीअनुसार प्रतिलिटर २ रुपैयाँ वा करिब १ प्रतिशतसम्म मूल्य हेरफेर गर्ने अधिकार निगम व्यवस्थापनलाई भए पनि यसपटक मूल्यवृद्धि सो सीमाभन्दा धेरै भएकाले सञ्चालक समितिको निर्णय आवश्यक पर्ने भएको छ।
शनिबार सार्वजनिक बिदा परेकाले बोर्ड बैठक बस्न नसकेको र बैठकपछि मात्रै नयाँ मूल्य सार्वजनिक गरिने निगमका प्रवक्ता मनोजकुमार ठाकुरले बताएका छन्।
उद्योग, वाणिज्य तथा आपूर्ति मन्त्रालयका सचिव नारायणप्रसाद शर्मा दुवाडी अध्यक्ष रहेको निगमको सञ्चालक समितिले निर्णय गरेपछि पेट्रोल, डिजेल, मट्टितेल तथा अन्य पेट्रोलियम पदार्थको नयाँ मूल्य लागू हुने अपेक्षा गरिएको छ।
यद्यपि मूल्य कति बढ्छ भन्ने विषयमा निगमले अझै आधिकारिक निर्णय गरेको छैन। आईओसीबाट आएको नयाँ खरिद मूल्य, कर संरचना, ढुवानी लागत र निगमको मूल्य समायोजन नीतिका आधारमा अन्तिम मूल्य निर्धारण गरिने भएकाले उपभोक्ताले कति रुपैयाँ बढी तिर्नुपर्नेछ भन्ने निर्णय बोर्ड बैठकपछि मात्र स्पष्ट हुनेछ।
