भक्तपुर । कोरोनाले विश्वनै आतंकित बनाइरहेको बेला पनि अपराधका घटना भने घटिरहेका छन् । १३ वर्षीया बालिकालाई जबरजस्ती करणी गरेको अभियोगमा भक्तपुर नगरपालिका ८ लिवाली डेरा गरी बस्ने सोही नगरपालिका ७ गोलमढी घर भएका ५९ वर्षीय रत्नप्रसाद शाहीलाई प्रहरीले पक्राउ गरेको छ । शाहीले ती बालिकालाई आफ्नो कोठामा बोलाई ललाइफकाई जबरजस्ती करणी गरेको भन्ने खबर प्राप्त हुनासाथ महानगरीय प्रहरी वृत्त जगातीबाट खटिएको प्रहरीले उनलाई पक्राउ गरेको हो ।
यसैगरी, दार्चुला, १६ वर्षीया किशोरीलाई जबरजस्ती करणी गरेको अभियोगमा दुहु गाउँपालिका ४ बस्ने २९ वर्षीया गणेश सिंह लोत्थ्याललाई पक्राउ गरेको छ । लोत्थ्यालले ती किशोरीलाई व्यास नगरपालिका ४ स्थित एक विद्यालयको कम्पाउण्डमा लगी जबरजस्ती करणी गरेको भन्ने खबर प्राप्त हुनासाथ प्रहरी चौकी सुनसेराबाट खटिएको प्रहरीले उनलाई पक्राउ गरेको हो । उता, सिरहाकी १० बर्षीया बालिकालाई जबरजस्ती करणी गरेको अभियोगमा लहान नगरपालिका ५ शान्तिटोल बस्ने ४२ वर्षीय कैलाश गोसाईलाई प्रहरीले पक्राउ गरेको छ । ती बालिकालाई जबरजस्ती करणी गरको भन्ने खबर प्राप्त हुनासाथ ईलाका प्रहरी कार्यालय लहानबाट खटिएको प्रहरीले गोसाईलाई पक्राउ गरेको हो ।