काठमाडौं । सुनको भाउ लगातार दोश्रो दिन घटेको छ । साउन २३ गते, मंगलबार सुन तोलामा ३०० रुपैयाँले सस्तिएको हो । तीन दिनदेखि स्थिर रहेको चाँदीको भाउ पनि आज गिरावट भएको छ । नेपाल सुनचाँदी व्यवसायी महासंघका अनुसार आज छापावाल सुन प्रतितोला एक लाख १२ हजार १०० रुपैयाँमा र तेजाबी सुन प्रतितोला एक लाख ११ हजार ५५० रुपैयाँमा कारोबार भइरहेको छ । सोमबार पनि सुनको भाउ ओरालो लागेको थियो । हिजो सुन प्रतितोला १०० रुपैयाँले गिरावट भएर एक लाख १२ हजार ४०० रुपैयाँमा झरेको थियो । अर्कोतर्फ, निरन्तर तेश्रो दिन स्थिर भएको चाँदीको मूल्य भने मंगलबार घटेको छ । यस दिन चाँदी तोलामा २५ रुपैयाँले घट्दा प्रतितोला एक हजार ४०० रुपैयाँमा खरिदबिक्री हुँदैछ । अघिल्लो कारोबार दिन, चाँदी प्रतितोला एक हजार ४२५ रुपैयाँ कायम रहेको थियो ।