व्यक्तिको सोचाईले उसको जीवनस्तर निर्धारण गर्दछ । सोच धेरै प्रकारका हुन्छन् जसमा काम चलाउ, दीर्घकालीन, अल्पकालीन, क्षणिक वा विविध प्रकारका हुन्छन् । कुनै कुनै व्यक्तिमा म यो गरीछाड्छु भन्ने हुन्छ भने कोही व्यक्तिमा त्यस्तो योजना नै हुँदैन । आजको आवश्यकता कसरी पूरा गर्ने भन्नेमा मात्रै उनीहरुको ध्यान केन्द्रीत हुन्छ । व्यक्तिको मानसपटलमा आएका विचार जे जस्ता भए पनि सकारात्मक हुनु जरुरी छ । दैनिक जीवनयापन सुखद्–दुखद् जे जस्तो भए पनि हरेक मानिसले आफ्नो गुजारा चलाएकै छन् ।
मानव सभ्यताको विकासक्रमसँगसँगै विविध प्रकारका विचारहरु देखापर्न थाले । जसमा आर्थिक, नैतिक, व्यवसायिक, पारदर्शी, स्वार्थी, सहयोगी आदि । तिनै विचारहरुलाई दुई खण्डमा विभाजन गरी सकारात्मक र नकारात्मक सोचको व्याख्या गरिएको हो । सकारात्मक विचार भनेको जहिले पनि राम्रो देख्ने हुन्छ त्यो भनेको धेरैले हिलोलाई घृणा गर्दछन्, मन पराउँदैनन् तर त्यही हिलोमा फुलेको कमलको फुल सबैले मन पराउँछन् । सकारात्मक र नकारात्मक भनेको यही हो ।
हरेक कुरामा सकारात्मक र नकारात्मक सोच रहेको हुन्छ । हामीले कुनलाई प्राथमिकता दिने भन्ने सोच नै प्राथमिकताको कुरा हो । सकारात्मक सोच व्यक्ति, समाज, राज्य तथा आर्थिक विकासको पूर्वाधार हो भने नकारात्मक सोचले विनास निम्त्याउँछ भने आफ्नो चरित्र पनि नकारात्मक नै बनाउँछ । जुन देशमा विकास भएको छ त्यो सकारात्मक सोचकै कारण सम्भव भएको हो । हामीले पनि सकारात्मक सोचलाई व्यवहारमा ल्याउनु पर्दछ । प्रगति, उन्नति, विकास निर्माण सबै सकारात्मक सोचको नतिजा हो । सकारात्मक सोचको अभ्यास दैनिक गर्नुपर्छ । जसले मानसिकता नै ऊर्जासिल बनाई कर्म, आचरणमा सुधार ल्याई मानिसलाई ज्ञानी बनाइदिन्छ । कागतीको विरुवा रोपेर स्याउको अपेक्षा गर्नु नकारात्मक सोच हो ।
बीमा व्यवसायमा सकारात्मक साेच
बीमा व्यवसायमा पनि सकारात्म सोचको आवश्यकता पर्दछ । अझ दाबी भुक्तानीमा सकारात्मक सोचको धेरै नै महत्व छ । बीमा लेखमा केही अपवादहरु हुन्छन् । धेरै सकारात्मक पक्ष हुँदाहुँदै केही नकारात्मक पक्ष पनि हुन्छन् । त्यहाँ नकारात्मक पक्षलाई बढाईचढाई गर्नु हँुदैन । सकारात्मक पक्षबाट नै दाबी भुक्तानीको निकास निकाल्नु पर्दछ । कुनै पनि कुराको नकारात्मक पक्ष हुन्छ नै । तर त्यही नकारात्मक पक्षबाट पनि सकारात्मक उपाय खोज्नु पर्दछ । जसरी समस्याबाटै समाधानको उपाय निकालिन्छ । अध्यारो रात आएपछि नै उज्यालो दिनको आगमन हुने हो । अध्यारो आउनु भनेकै उज्यालोको प्रतिक्षा गर्नु हो ।
बीमा क्षेत्रमा दुर्घटना, भवितव्य, नकारात्मक पक्ष हुन् । तर पनि यसको समाधान र सम्बोधन सकारात्मक तरिकाले गर्नु पर्दछ । हरेक व्यक्तिको मनोभावना र शैली सकारात्मक हुनै पर्दछ । समय परिवर्तनशील छ, यसैले ऊर्जा प्रदान गरी नयाँ बाटो देखाउँछ ।
जसरी घर निर्माण प्रक्रियामा एउटा इँटाको जति महत्व हुन्छ बिगार्नमा पनि त्यही एउटा इँटा काफी छ । इँटामाथि इँटा थप्दै जाँदा घरको संरचना बन्छ भने बनेको घरको इँटा झिक्दै जाने हो भने त्यो संरचना ध्वस्त हुन्छ । त्यसैले सकारामक सोच लिएर मात्रै हामी रमाउन सक्नु पदर्छ ।
(लेखक नेपाल इन्स्योरेन्स कम्पनीका नायव महाप्रबन्धक हुनुहुन्छ)
