काठमाडौँ । कोरोना संक्रमितको संख्या अप्रत्यासित रुपमा बढ्न थालेपछि संघीय संसद्का सबै सांसदलाई काठमाडौं उपत्यका छाडेर बाहिर जान रोक लगाइएको छ । संसद् सचिवालयका अनुसार आआफ्नो पार्टीका संसदीय दलले मंगलबार सांसदहरूलाई उक्त सूचना प्रवाह गरेका छन् । संसद् बैठक सञ्चालन हुनुअघि सचिवालयले सबै सांसदको पीसीआर विधिबाट कोभिड–१९ को परीक्षण गराएको थियो । सबैको रिपोर्ट नेगेटिभ आएको छ । पछिल्लो समय विशेषतः भारतीय सीमा जोडिएका जिल्लाहरूमा संक्रमितको संख्या ह्वात्तै बढेपछि सांसदहरूलाई काठमाडौं बाहिर नजान सूचित गरिएको हो ।

भीभीआईपीको पीसीआर परीक्षण
संघीय संसदका सबै सांसदको कोरोना परीक्षण गरिसकिएकोमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, मुख्यसचिव लोकदर्शन रेग्मी र प्रधानसेनापति पूर्णचन्द्र थापाको पीसीआर प्रविधिबाट स्वास्थ्य परीक्षण गरिएको छ । राष्ट्रपति कार्यालयका ३७ जना र उपराष्ट्रपति कार्यालयका ६४ जनाको परीक्षण गरिएको छ । राष्ट्रपति विद्यादेवी भण्डारीले आगामी जेठ २ गते संघीय संसद्को संयुक्त बैठकमा सरकारको नीति तथा कार्यक्रम पढ्ने सूची संसद् सचिवालयले तयार गरेको छ । उक्त दिन कोभिड–१९ परीक्षण गरेर नेगेटिभ देखिएको प्रमाणपत्रका आधारमा मात्र संसद् भवन प्रवेश गर्न पाइनेछ । राष्ट्रपतिले सम्बोधन गर्ने संघीय संसद्को यसपटकको संयुक्त बैठकमा नेपालस्थित विदेशी राजदूतहरूलाई नबोलाइने भएको छ ।