काठमाडौं । गरिबीका रेखामुनी रहेका २१ प्रतिशत नेपाली नागरिकलाई लक्षित गर्दै सिटिजन लाइफ इन्स्योरेन्स कम्पनीले सिटिजन शुभारम्भ जीवन बीमा योजना ल्याएको छ । राजधानीमा आयोजित एक बिशेष कार्यक्रममा उक्त बीमा योजना सार्वजनिक गरेको हो । पाँच बर्षदेखि ६५ बर्ष उमेरसम्मका व्यक्ति यो योजनामा सामेल हुन सक्ने बताइएको छ । बीमा अवधी भने पाँच देखि ३५ बर्षसम्मको हुने बताइन्छ ।
कम्पनीका सञ्चालक समितिका सदस्यहरू मनोज कार्की तथा दिपप्रकाश पाण्डे, प्रमुख कार्यकारी अधिकृत पोषकराज पौडेल तथा ब्राण्ड एम्बेसेडरद्वय वरिष्ठ कलाकार हरिवंश आचार्य र मदन कृष्ण श्रेष्ठले संयुक्त रूपमा उक्त योजनाको सार्वजनिक गरेका थिए । कम्पनीका अनुसार यस योजनाअन्तरगत न्यूनतम रू १० हजारको बीमांंकमा नै बीमा गर्न सकिन्छ । साथै, यसले बीमा अवधीभर तोकिएको जोखिमको रक्षावरण गरि बीमितहरूलाई डबल सुरक्षा प्रदान गर्ने बताइएको छ ।
योजना अनुसार बीमितको साधारण मृत्यु भएमा इच्छाएको व्यक्तिले बीमांकको डबल रकम पाउनेछन् । यदि, दुर्घटनाका कारण बीमितको मृत्यु भयो भने बीमांकको तीन गुणा रकम प्रदान गरिने बताइएको छ । यसैगरि यस बीमा योजनाले स्थायी पूर्ण अशक्तता लाभ, बीमाशुल्क छुट लाभ, मासिक आय लाभ, काजक्रिया खर्च सुविधा तथा रु. ५० लाखसम्मको घातक रोग उपचार खर्च जस्ता सुविधाहरू रहेको छ ।
कार्यक्रममा ब्राण्ड एम्बेसेडरद्वय आचार्य र श्रेष्ठले पनि बीमाको महत्व दर्साउदै बीमाको क्षेत्रगत दायरा बढाउनुपर्ने बताएका थिए ।