काठमाडौं । बीमा व्यवसाय विस्तारको क्रममा छ । शहरमा मात्रै केन्द्रीत बीमा कम्पनीहरु अहिले दूर दराजमा पनि व्यवसायको खोजी गर्द पुगेका छन् । चालु आर्थिक वर्ष २०७६–०७७ को पहिलो त्रैमासको तथ्यांकअनुसार नेपाल लाइफ र शिखर इन्स्योरेन्स सबैभन्दा धेरै बीमा शुल्क संकलन गर्न सफल भएको देखिन्छ ।
बीमा समितिको तथ्यांकअनुसार बीमा कम्पनीहरुबाट कूल २८ अर्ब ५० करोड रुपैयाँ बीमा शुल्क संकलन भएकोमा जीवन बीमातर्फ २१ अर्ब ५० करोड र निर्जीवन बीमा तर्फ ६ अर्ब ९८ करोड बीमा शुल्क संकलन भएको पाइएको छ।
जीवन बीमाअन्तगर्त नेपाल लाइफ इन्स्योरेन्सले मात्रै ७ अर्ब ८९ करोड भन्दा बढी बीमा शुल्क संकलन गरेको तथ्यांकले देखाएको छ भने निर्जीवन तर्फ शिखर इन्स्योरेन्सले ९२ करोड १४ लाख रुपैयाँ बीमा शुल्क आर्जन गरेको देखिन्छ ।
यसैगरी एलआईसी नेपालले ४ अर्ब २० करोड, नेशनल लाईफले १ अर्ब ८९ करोड, मेट लाइफले १ अर्ब २० करोड र राष्ट्रिय बीमा संस्थानले १ अर्ब १ करोड रुपैयाँ बीमा शुल्क संकलन गरेका छन् । बाँकी कम्पनीहरुले बीमा शुल्क अर्ब कटाउन सकेको देखिँदैन।
नयाँ बीमा कम्पनी युनियन लाइफले पुराना कम्पनीहरुलाई समेत उछिनेर ७९ करोड २६ लाख रुपैयाँ बीमा शुल्क संकलन गरेको छ । निर्जीवन बीमा कम्पनीहरुले चालु आर्थिक वर्षको पहिलो त्रैमास सम्ममा ६ अर्ब ९८ करोड रुपैयाँ कुल बीमा शुल्क संकलन गरेका छन् । हाल संचालनमा रहेका २० निर्जीवन बीमा कम्पनीहरु मध्ये राष्ट्रिय बीमा कम्पनी बाहेकबाट उक्त रकम बराबरको बीमा शुल्क संकलन गरिएको हो । बीमा समितिको तथ्यांक अनुसार सबै भन्दा धेरै शिखर इन्स्योरेन्सले ९२ करोड १४ लाख रुपैयाँ बीमा शुल्क आर्जन गरेको छ । यसैगरी सगरमाथाले ६७ करोड ५८ लाख, सिद्धार्थले ५९ करोड ३४ लाख, नेकोले ५६ करोड ३ लाख रुपैयाँ बीमा शुल्क संकलन गरेको बीमा समितिको तथ्यांक छ । सञ्चालनमा आएको दुई वर्ष भएको अजोड इन्स्योरेन्सले २० करोड रुपैयाँ बीमा शुल्क संकलन गरेको छ । यस्तै जनरल इन्स्योरेन्सले १४ करोड ९ लाख रुपैयाँ बीमा शुल्क संकलन गर्दा सबै भन्दा कम सानिमा जनरल इन्स्यारेन्सले ८ करोड ९३ लाख बीमा शुल्क संकलन गरेका छन् ।
