काठमाडौं । अदालतबाट दोषी करार भई सजाय भुक्तान गर्नुपर्ने १ लाख १६ हजार ४ सय २६ अभियुक्तहरु अझै पनि फरारको सूचिमै रहेका छन् । सर्वोच्च अदालत फैसला कार्यान्वयन निर्देशनालयको अभिलेखअनुसार स्वदेशी १ लाख १४ हजार ९ सय १० र विदेशी १५ सय १६ जना गरी एक लाख १६ हजार ४ सय २६ जना अभियुक्त अझै फरारको सूचिमा रहेका हुन् । उक्त कार्यालयका सहायक प्रवक्ता मञ्जु ओझाकाअनुसार, यो तथ्यांक गत कात्तिक महिनासम्मको मात्र हो ।
त्यसपछि कतिपय फरार अभियुक्तहरुलाई पक्राउ गरी जेल चलान भइसकेका र केही फेरि फरारको सूचिमा थपिएको हुँदा संख्या तलमाथि हुन सक्ने उनको भनाई छ । उच्च अदालत बिराटनगर र त्यसअन्तर्गतका जिल्ला अदालतबाट स्वदेशी र विदेशी गरी १५९२७, उच्च अदालत जनकपुर र त्यस मातहतका जिल्ला अदालतको कार्यक्षेत्रबाट भएका फैसलामा कैद भुक्तान गर्नुपर्ने २७८६६, उच्च अदालत पाटन र त्यसमातहतका अदालतबाट भएका फैसलाबाट अभियुक्त ठहर भएका ४२८२६, उच्च अदालत पोखरा र मातहतका अदालतको कार्यक्षेत्रबाट फैसला भई दोषी ठहर भएका अभियुक्त ५३५८, उच्च अदालत तुलसीपुर र मातहतका अदालतबाट फैसलामा दोषी ठहरिइ कैद भुक्तान गर्नुपर्ने अभियुक्तहरु १६८०९, उच्च अदालत दीपालय र मातहतका अदालतबाट फैसला भई पक्राउ गर्नुपर्ने अभियुक्तको संख्या ५२४१ रहेको छ भने सबैभन्दा कम उच्च अदालत सुर्खेत र मातहतको कार्यक्षेत्रमा २३९९ अभियुक्त रहेका छन् ।
फरार अभियुक्तको सूचिमा रहेकाहरुलाई पक्राउ गरी जेल चलान गर्न सम्बन्धित जिल्ला प्रहरी कार्यालय, जिल्ला प्रशासन कार्यालयलाई सम्बन्धित जिल्ला अदालतको तहसिल शाखाले विवरण उपलब्ध गराइसकेको र ती कार्यालयले पनि खोजविन गरी गरिरहेको बताइएको छ ।
