काठमाडौं । सरकारले बेमौसमी बाजा बजाउँदै अध्यादेश जारी गरेको २४ घण्टा बित्न नपाउँदै प्रमुख प्रतिपक्षी दल नेपाली काँगे्रसदेखि लिएर संसदमा प्रतिनिधित्व गर्ने राष्ट्रिय जनता पार्टी र संसदमा १ जना प्रतिनिधित्व रहेको राष्ट्रिय प्रजातन्त्र पार्टीले औपचारिक रुपमा आफ्नो धारणा सार्वजनिक गरेका छन् । संघीय समाजवादी फोरमले औपचारिक रुपमा धारणा सार्वजनिक नगरे पनि पार्टी अध्यक्षद्वय डा. बाबुराम भट्टराई र उपेन्द्र यादवले विभिन्न सञ्चारमाध्यममा अध्यादेशको विरोध गरेका छन् । नेपाली काँग्रेसको आज बिहान सभापति शेरबहादुर देउवाको निजी निवास बुढानिलकण्ठमा बसेको पार्टी पदाधिकारी बैठकपछि जारी विज्ञप्तिमा दुवै अध्यादेश जारी गरेर सरकारले लोकतन्त्र र संविधानको मर्ममाथि नै प्रहार गरेको जनाउँदै अध्यादेश फिर्ता लिन माग गरेका छन् । राप्रपाका अध्यक्षत्रय पशुपतिसमशेर जबरा, डा. प्रकाशचन्द्र लोहनी र कमल थापाद्वारा हस्ताक्षरित विज्ञप्तिमा अध्यादेश जारी गरेर सरकारले राजनीतिक अस्थिरता निम्त्याउने काम गरेको जनाइएको छ । त्यस्तै राजपा अध्यक्षमण्डलका संयोजक शरदसिंह भण्डारीद्वारा जारी विज्ञप्तिमा पनि कोरोनाविरुद्ध सबै शक्ति एकजुट हुनुपर्ने बेलामा सरकारले ध्यान अन्यत्रै मोडेको बताउँदै अध्यादेश लोकतान्त्रिक धारणाविपरत आएको बताएका छन् । यसैगरी दुवै अध्यादेशको विरुद्धमा आज सर्वोच्च अदालतमा रिट दायर गर्ने प्रयास गरिए पनि रिटमा राष्ट्रपतिलाई विपक्षी बनाइएको भन्दै सर्वोच्च अदालतले रिट दर्ता गर्न अस्वीकार गरेको छ ।