काठमाडौं । स्थलगत रुपमै खाद्य सामग्रीको गुणस्तर परीक्षण गर्नका निम्ति पहिलो पटक प्रविधियुक्त खाद्य तथा गुण नियन्त्रण विभागले भित्र्याएको मोबाइल ल्याब भ्यान प्रयोग नै नभई कार्यालयको प्राङ्गणमा थन्किएको छ । गत असार महिनामै चारवटा मोबाइल ल्याब भ्यान विभागको जिम्मामा आएपछि खाद्य गुणस्तर परीक्षणमा सहजता आउने, उपभोक्ताहरुले अखाद्य वस्तुहरुको उपयोग गर्न नपर्ने अवस्था सिर्जना हुँदै जाने र खाद्य बजार पनि नियन्त्रणमा आउने विश्वास गरिएको थियो ।
प्रधानमन्त्री कृषि आयोजना कार्यालयले आफ्नो बजेटबाट दुईवटा मोबाइल ल्याब भ्यान खरिद गरेर विभागलाई हस्तान्तरण गरेको थियो भने विभागको आफ्नै बजेटबाट थप दुईवटा भ्यान खरिद गरिएको थियो । करिब २८ करोडको लगानीमा चारवटा मोबाइल भ्यान खरिद गरिएकोमा खरिद प्रक्रिया नै त्रुटिपूर्ण भएको भन्दै अख्तियार दुरुपयोग अनुसन्धान आयोगले छानविन प्रक्रिया अगाडि बढाएको थियो । छानविनपछि खरिद प्रक्रियामा त्रुटी भएको निश्कर्ष निकाल्दै अख्तियारले विशेष अदालतमा विभागका तत्कालिन महानिर्देशक सञ्जिव कर्णलगायत विभागका १३ जना कर्मचारीविरुद्ध विशेष अदालतमा मुद्दा दायर भएपछि घटनाले अर्को मोड लिन पुगेको थियो ।
विशेष अदालतमा मुद्दा दर्ता भएपछि चारवटा भ्यान अहिले विभागले प्रयोग नै नगरी विभाग परिसरको खुला चौरमा राखिएको छ । घाम–पानी सहेर बसिरहेका भ्यानका चक्काहरु दुबो र झारपातमा डुबिसकेका छन् । विभागका प्रवक्ता मोहनकृष्ण महर्जनले अदालतमा भ्यान खरिद प्रक्रिया सन्दर्भमा मुद्दा विचाराधिन रहेको अवस्थामा मुद्दालाई प्रतिकूल असर पर्ने गरी उक्त भ्यानहरु प्रयोगमा नल्याएको बताउनुभयो । उहाँले भ्यान खरिद गर्दा केही रकम सप्लायर्सलाई दिन बाँकी रहेको र मुद्दाको टुंगो लागेपछि मात्रै भ्यान प्रयोग ल्याउने या नल्याउने भन्ने बारेमा निक्र्यौल हुने बताउनुभयो ।
