काठमाडौं । नेपाल इन्फ्रास्ट्रक्चर बैंक लिमिटेडको संचालक समितिको अध्यक्षमा नियुक्त भएका व्यवसायी अनुज अग्रवालले नेपाल राष्ट्र बैंकका गभर्नर डा. चिरञ्जीवी नेपालसमक्ष पद तथा गोपनीयताको शपथ लिएका छन् । बैंकको प्रथम वार्षिक साधारणसभाबाट नेपालकै पहिलो राष्ट्रिय स्तरको पूर्वाधार विकास बैंकको रुपमा स्थापित इन्फ्रास्ट्रक्चर बैंक संचालक समितिको अध्यक्षमा अग्रवाल चुनिएका थिए । शपथ ग्रहण समारोहमा नेपाल राष्ट्र बैंकको तर्फबाट डेपुटी गभर्नर चिन्तामणि सिवाकोटी, कार्यकारी निर्देशक देवकुमार ढकाल, निर्देशक गोविन्द नागिला समेतको उपस्थिती रहेको थियो ।
त्यस्तै, नेपाल इन्फ्रास्ट्रक्चर बैंकका संचालक चन्द्रप्रसाद ढकाल, बैंकका नायव प्रमुख कार्यकारी अधिकृत भुपेन्द्र पाण्डे र कम्पनी सचिव इश्वरबन्धु गौतमको उपस्थिती रहेको थियो ।
बैंकको संचालक समितिमा रामशरण पुडासैनी नेपाल सरकारबाट मनोनित भएका हुन् भने अनुज अग्रवाल, चन्द्रप्रसाद ढकाल र लालमणि जोशी हालै सम्पन्न बैंकको प्रथम वार्षिक साधारण सभाबाट संचालकमा निर्विरोध निर्वाचित भएका थिए ।