काठमाडौं । अमेरिकालाई स्वर्ग देख्नेहरुलाई दुःखी बनाउने समाचार छ । अमेरिकाले ‘बर्थ टुरिजम’ (जन्म पर्यटन) लाई अब रोक्ने नीति ल्याउने भएको छ । यसअघि गर्भवती महिलाले अमेरिकाको भिसा लिने, अमेरिकामा बच्चा जन्माउने र त्यसको उद्देश्य आफ्नो बच्चालाई अमेरिकी नागरिक बनाउने चलन रहेको थियो । अब भने अमेरिकी विदेश मन्त्रालयले त्यसो हुन नदिने नीनि अख्तियार गरेको छ । अमेरिकी अधिकारीहरुका अनुसार अब गर्भवतीले पहिलो प्राथमिकता बच्चा जन्माउने भन्दा पनि अमेरिकामा अरु नै काम भएको देखाउनुपर्नेछ । साथै अमेरिकाले स्वास्थ्य उपचार सम्बन्धी आउने मानिसमा पनि कडाई गर्ने भएको छ ।

यसका लागि भिसा आवेदकले आफ्नो खर्च बर्चको जानकारी पहिला नै जानकारी गराउनुपर्नेछ । अमेरिकी करदाताको रकम दुरुपयोग नहोस् भन्ने अमेरिकी चाहना रहेको बताइएको छ । अमेरिकी राष्ट्रपति डोनाल्ड टम्पले सो सम्बन्धी अमेरिकी नीतिको विगतमा आलोचना गर्दै आएका थिए । सन् २०१७ मा विदेशी आमाबाट अमेरिकामा १० हजार बच्चा जन्मेका थिए भने दश वर्ष अघि सन् २००७ मा सो संख्या ७ हजार ८ सय रहेको थियो । २०१६ र २०१७ को बीचमा ३३ हजार बच्चा अस्थायी पर्यटकका रुपमा अमेरिकामा जन्मिएको बताइन्छ ।