काठमाडौं । ठूला बडा र धनीमानीका कमाई पनि करोडौं हुन्छ नोक्सानी पनि करोडौैकै हुन्छ । विश्वका सबैभन्दा धनी व्यक्तिको सूचिमा रहेका अमेजन कम्पनीका सीईओ जेफ बेजोसले एक दिनमै झण्डै ७ अर्ब डलर गुमाउन पुगेका छन् । ७ अर्ब डलर मात्र गुमाएनन् केही क्षणका लागि विश्वको सबैभन्दा धनी व्यक्तिको स्थान पनि उनले गुमाउनु परेको थियो ।
अमेजन कम्पनीले आफ्नो तेश्रो त्रैमासिकको आय प्रतिवेदन सार्वजनिक गरे लगत्तै अमेजन कम्पनीको शेयर मूल्यमा तीव्र गिरावट आउँदा बेजोसले एकै दिनमा झण्डै ७ अर्ब डलर गुमाउनु परेको हो । अक्टोबर २४ मा अमेजनको शेयर मूल्यमा ७ प्रतिशतले गिरावट आएसँगै बेजोसले आफ्नो नामको शेयरबाट समेत ६ अर्ब ९० करोड गुमाएका थिए । त्यो सँगै बेजोसको कूल सम्पत्ति १ खर्ब ३ अर्ब ९० करोडमा झर्न पुगेको थियो ।
बेजोसको सम्पत्तिमा गिरावटसँगै बिहीबार केही समयका लागि माइक्रोसफ्टका संस्थापक बिल गेट्स विश्वको सबैभन्दा धनी व्यक्ति बन्न पुगेका थिए । गेट्सको कूल सम्पत्ति १ खर्ब ५ अर्ब ७० करोड रहेको छ । तर, गेट्सको नम्बर वान स्थान धेरै बेर टिकेन । अमेजनको शेयर मूल्यमा सुधारसँगै अन्ततः अहिले बेजोस नै पुनः विश्वको सबैभनदा धनी व्यक्तिको रुपमा एक नम्बरमा उक्लिएका थिए । जेफ बेजोसको सम्पत्ति १ खर्ब ११ अर्ब छ भने बिल गेट्सको १ खर्ब ७ अर्ब पुगेको छ ।
सिएनबिसीको रिपोर्ट अनुसार बेजोसँग अमेजन कम्पनीको ५ करोड ७६ लाख १० हजार ३५९ कित्ता शेयर छ । त्यसैले अमेजनको शेयर मूल्यमा ६.६ प्रतिशतले गिरावट आउँदा बेजोसले ६ अर्ब ९० करोड डलर गुमाउनु परेको थियो ।
स्मरण रहोस् बिल गेट्सलाई पछि पार्दै पहिलो पटक सन् २०१८ मा माइक्रोसफ्ट कम्पनीका जेफ बेजोस विश्वको सबैभन्दा धनी व्यक्ति बनेका थिए । त्यसयता उनले आफ्नो कूल सम्पत्तिको १३ अर्ब ९० करोड गुमाइसकेका छन् । यसअघि पत्नीसँगको सम्बन्ध विच्छेदसँगै अमेजन कम्पनीको एक चौथाई शेयर बेजोसले पूर्वपत्नीको नाममा हस्तान्तरण गरेका थिए । सम्बन्ध विच्छेदलाई फोब्र्स पत्रिकाले विश्वकै सबैभन्दा महंगो डिभोर्सको रुपमा चित्रित गरकेो थियो । डिभोर्स अगाडि बेजोससँग अमेजन कम्पनीको ७ करोड ८६ लाख कित्ता शेयर थियो । त्यसमध्ये उनले डिभोर्स गरिएकी पत्नीको नाउँमा १ करोड ९७ लाख कित्ता हस्तान्तरण गरेका थिए । (एजेनसी)
