काठमाडौं । मान्छेको मृत्युपछि हुने अन्तिम संसकारका लागि पशुपति आर्यघाटमा पुगेको शवलाई प्रहरीले उठाएको छ भने छोरालाई पक्राउ गरेको छ । प्रहरीले पशुपति आर्यघाटमा जलाउन लागेको शव बरामद गरेको हो ।
स्थानीयको उजुरीपछि प्रहरीले आर्यघाटबाटै लास उठाएर अनुसन्धान थालेको हो । महानगरीय प्रहरी परिसर ललितपुरले ललितपुर गोदावरीका ५० वर्षका कृष्ण नेपालीको शव बरामद गरेर उनका छोरा ३० वर्षका सन्तोष नेपालीलाई पक्राउ गरेको हो । हत्या भएको आशंकामा शव बरामद गरेर अनुसन्धान सुरु गरेको ललितपुरका डीएसपी सन्तोष तामाङले जानकारी दिए ।
प्रहरीका अनुसार गत बिहीबार राति रक्सी खाएका बेला कृष्ण र छोरा सन्तोषबीच झगडा भएको थियो । त्यसै क्रममा सन्तोषले बाबुमाथि कुटपिठ गरेका थिए । बिहान बाबु बेहोस देखेपछि सैनिक अस्पताल छाउनीमा उपचारका लगी लगेका थिए । तर अस्पतालले मृत घोषणा गर्यो । दाह संस्कारका लागि शव आर्यघाट लगिएपछि गाउँलेले प्रहरीलाई खबर गरेका थिए ।
