काठमाडौं । आशा लघुवित्त वित्तीय संस्थाले कम्पनीको नवौं वार्षिक साधारणसभा बोलाएको छ । पुस ४ गते शुक्रबार धुलिखेलको होटल अरनिकोमा बोलाएको साधारणसभाले लाभांश पारित गर्ने लगायत एजेन्डामा छलफल गर्ने कम्पनीले जनाएको छ । कम्पनीले संस्थाको गत आर्थिक वर्षको मुनाफाबाट कुल चुक्ता पुँजीको ९ दशमलव पाँच प्रतिशतले हुन आउने छ करोड ९६ लाख रुपैयाँ बोनस शेयर वितरणको प्रस्ताव पारित गर्ने तयारी गरेको छ । साथै, सो सम्बन्धमा प्रबन्धपत्रको दफा ६(ख) र (ग)मा केही संशोधन गर्ने तयारी समेत गरेको छ । साथै कम्पनीले कर प्रयोजनका लागि कुल चुक्ता पुँजीको शून्य दशमलव पाँच प्रतिशतले हुन आउने रकम नगद लाभांशको रूपमा पनि पारित गर्ने तयारी गरेको छ । संस्थाले लघुवित्त संस्थाहरू गाभ्ने गाभिने तथा एक्विजिसनको लागि सञ्चालक समितिलाई अख्तियारी दिने तयारी पनि गरेको छ ।