एजेन्सी । कोरानाको उद्गमस्थल चीनको बुहानमा त्यसको संक्रमणदर नियन्त्रणमा आइसक्दा विश्वका अन्य मुलुकलाई भने कोरोना संक्रमणले नराम्रोसँग अत्याइरहेको छ । कोरोना भाईरसको संक्रमण बढेपछि ईटालीको विश्वसमुदायसँग हवाई र रेल सम्पर्क पूर्ण रुपमा बन्द अवस्थामा पुगेको छ । चीनभन्दा तीन सातापछि कोरोना भाईरसको संक्रमण देखिए पनि अहिलेसम्मकै खराब असर व्यहोरिरहेको ईटालीमा मार्च १२ तारिखसम्ममा विश्वभरबाट हुँदै आएको ९५ प्रतिशत हवाई उडान बन्द भईसकेको छ । मार्चा १४ बाट हाल उडान भरिरहेका अधिकाशं देशले उडान रोक्ने घोषणा गरेका छन् । जस अनुसार मार्च १५ पछि ईटालीबाट बाहिरिन चाहने र ईटाली जानुपर्ने यात्रुले त्यसअघिनै यात्रा गरिसक्नुपर्ने भएको छ ।
यसैगरि ईटालीको छिमेकी देशहरु फ्रान्स र अष्ट्रियाले हवाई उडान १४ तारिखबाट मार्चा ३ तारिखसम्म बन्द गर्ने घोषणा गरेको छ । रेल मार्गले छोएका यि देश सहित स्लोभेनिया, स्विजरल्याण्ड समेतले रेल सेवा बन्द गर्दै अनुमतिविनिा देशभित्र प्रवेशमा रोक लगाएका छन् ।
स्पेन सहित बेलायतले समेत ईटालीमा गर्दै आएको सम्पूर्ण उडान रद्दको घोषणा गर्दै अर्को सूचना नभएसम्म उडान नहुने बताएका छन् । ईटाली सरकारले देशभर आपतकाल घोषणा गर्दै अप्रिल ३ तारिखसम्म अत्यावश्यक काम बाहेक घरबाहिर ननिक्लन नागरिकहरुलाई आग्रह गरेको छ । बिहिबार मात्र ईटाली सरकारले देशभरका होटल तथा रेष्टुरेष्ट बन्द गर्न आदेश दिएको छ । होटल रेष्टुरेण्ट समेत कोरोना भाईरस संक्रमण फैलनुको एक कारण भएको भन्दै त्यहाँका प्रधानमन्त्री गिउसेप्पे कोन्तेले बन्द गर्न आग्रह गरेका छन् । तर औषधि पसल सहित अत्यावश्क सामग्री विक्रिहुने खाद्यान्न तथा दैनिक उपभोग्य सामानका पसलहरु भने संक्रमण फैलन नदिने उपायहरु अपनाएर नियमित सञ्चालन गर्न आग्रह गरेका छन् ।
मार्च १२ बिहिबार अपरान्हसम्ममा ईटालीमा कोरोना भाईरसबाट संक्रमित ८ सय ३२ जनाले ज्यान गुमाउँदा करिव ११ सय व्यक्ति गम्भिर अवस्थामा रहेको बताईएको छ । यसैगरि कोरोना भाईरसबाट संक्रमितको संख्या १२ हजार ५ सय पुष्टि हुँदा लाखौं नागरिकको स्वास्थ्य परिक्षण थालिएको छ । कोरोना भाईरसको संक्रमण भएका १ हजार ४५ जनाको स्वास्थ्यमा भने सुधार आएको विश्व स्वास्थ्य संगठनले उल्लेख गरेको छ ।