काठमाडौं उपत्यकामा आइतबार १ सय ७२ जनामा कोरोनाभाइरसको संक्रमण पुष्टि भएको छ। स्वास्थ्य मन्त्रालयको नियमित पत्रकार सम्मेलनमा प्रवक्ता डाक्टर जागेश्वर गौतमले पछिल्लो २४ घन्टामा उपत्यकामा १ सय ७२ जनामा कोरोना पुष्टि भएको जनाए। संक्रमितमध्ये काठमाडौंमा १ सय २६ , ललितपुरमा ३८ र भक्तपुरमा ८ जना छन्। शनिबार काठमाडौं उपत्यकामा ९८ जनामा कोरोना पुष्टि भएको थियो। पछिल्लो २४ घन्टामा नेपालभरि ६ सय ४१ जनामा कोरोना संक्रमण पुष्टि भएको थियो।
पर्सामा सेना परिचालन
उता, पर्सामा निषेधाज्ञामा थप कडाइ गर्न आइतबारदेखि नेपाली सेना परिचालन गरिएको छ । निषेधाज्ञालाई अझै प्रभावकारी बनाउन अग्रपंक्तिमा खटिने सुरक्षाकर्मीको सहयोगका लागि सेना परिचालन गरिएको हो । पर्साका सडकमा आइतबारदेखि नै सेनाले गस्ती शुरु गरिसकेको छ । वीरगञ्जमा साउन १० गतेदेखि र पुरै पर्सा जिल्लामा साउन १९ गतेदेखि निषेधाज्ञा छ ।