काठमाडौं । नयाँ नयाँ बीमा लेखमार्फत् ग्राहकको मन जित्दै आएको एलआईसी नेपालले ‘जीवन बीमासहितको खुसीको बचत, जीवन बचत’ भन्ने नाराका राथ ‘जीवन बचत’ बीमा योजना सार्वजनिक गरेको छ ।
काठमाडौंमा एक विशेष समारोहको आयोजना गर्दै कम्पनीले ‘जीवन बचत’ योजना बीमा समितिका अध्यक्ष चिरञ्जीवी चापागाईंबाट गराएको हो ।
१६ देखि ६५ बर्ष उमेरका व्यक्तिहरुले यो जीवन बीमा योजनामा सहभागी हुन सक्ने बताइएको छ । न्यूनतम बीमाङ्क रकम एक लाख कायम गरिएको छ भने अधिकतम बीमाङ्कको सीमा बीमा अन्डरराइटिङ्ग नियमानुसार जति पनि लिन सकिने बताइएको छ । यस योजनामा बीमा अवधि न्युनतम ५ बर्ष र अधिकतम २५ बर्ष रहेको छ । बीमा परिपक्वतामा आर्जित बोनससहित बिमाङ्क रकम एकमुष्ठ प्रदान गरिनेछ । साथै, यस योजनामा बीमा परिपक्वतापछि बिमितले इच्छा अनुसार ५ देखि १० वर्ष भित्र सो रकम तोकिएको व्याजसहित किस्ताबन्दीमा समेत लिन सक्ने विशेषता पनि यस बीमा लेखमा रहेको बताइन्छ ।
न्युन बीमा शुल्क भएको यस ‘जीवन बचत’ योजनामा अधिकतम ७५ लाखसम्मको दुर्घटना लाभसमेत उपलब्ध गराइएको कम्पनीका प्रमुख कार्यकारी अधिकृत एलपी दासले बताउनुभयो । बीमा योजनामा विविध क्षेत्रका पेशाकर्मीहरुले मुद्दती निक्षेप जस्तै एकल बीमा शुल्क भुक्तानी गरी जीवन बीमा समेत प्राप्त गर्न सकिने बताइएको छ ।
कार्यक्रममा कम्पनीका नायब प्रमुख कार्यकारी अधिकृत टी बर्णवालले यो योजनाका उत्कृष्ट विशेषताहरुका कारण ग्राहकहरुमाझ लोकप्रिय हुने विश्वास व्यक्त गर्नुभएको थियो ।
