काठमाडौं । नेपाल सरकारको स्वामित्वमा रहेको निर्जिवन बीमा कम्पनी राष्ट्रिय बीमा कम्पनीसँगको सम्झौता रद्द गरेको अर्को सरकारी स्वामित्वको कर्मचारी सञ्चय कोषले आफैं बचतकर्ताहरुलाई बीमा सुविधा दिने भएको छ । यसअघि कोषमा रकम जम्मा गर्ने ६ लाख बढी बचतकर्ताको घातक रोगसहितको स्वास्थ्य बीमा राष्ट्रिय बीमा कम्पनीमा गरेको थियो ।
कर्मचारी सञ्चय कोषले गत मंसिर १ गतेबाट आफ्ना छ लाखभन्दा बढि कर्मचारीहरुको स्वास्थ्य बीमा आफूले गर्न सुरु गरेको हो । गतवर्ष राष्ट्रिय बीमा कम्पनीमा बीमा शुल्क भुक्तानी गरेर सञ्चालन गरिएको स्वास्थ्य बीमाको अवधी सकिएपछि मंसिर १ गतेदेखि कोषले राष्ट्रिय बीमा कम्पनीमा बीमा नविकरण नगरी आफैंले बीमा सेवा सञ्चालन गर्न सुरु गरेको हो ।
कर्मचारी सञ्चय कोषको ऐन, नियमको परिधिभित्र रहेर बीमा नभनिकन शोधभर्नाको रुपमा कर्मचारीको उपचार खर्च व्यवहोर्न सुरु गरेको कोषको दाबी छ । कोषले छ वटा विभिन्न शर्तमा स्वास्थ्य उपचार सुविधा दिने जनाएको छ । कोषले जारी गरेको सूचनामा मंसिर १ गतेदेखिको स्वास्थ्य उपचार खर्च कर्मचारी सञ्चय कोषले शोधभर्नामार्फत भुक्तानी गर्ने जनाएको हो ।
पोखरा विश्वविद्यालयका स्कुल अफ विजनेशका एसोसिएड प्रोफेशर बीमा क्षेत्रका ज्ञाता रविन्द्र घिमिरेले कोषको कदम राम्रो नभएको प्रतिक्रिया सामाजिक सञ्जालमार्फत् दिएका छन् ।
हेर्नुस् कर्मचारी सञ्चय कोषले जारी गरेको सूचना
