काठमाण्डौ । नयाँ सत्ता समिकरणलाई रोक्ने माओवादीको प्रयासलाई विफल बनाउन काँग्रेस र एमालेले हरसम्भव प्रयास गरेका छन् । प्रधानमन्त्री पुष्पकमल दाहालले विश्वासको मत नपाएपछि संविधानको धारा ७६ को उपधारा ३ आकर्षित हुने गरी नयाँ सरकार गठनको जिकिर गरिरहेको माओवादी लगायतका शक्तिकेन्द्रहरुलाई रोक्ने कांग्रेस–एमालेले पनि विशेष तयारी गरेका बुझिएको छ । एमालेका एक पदाधिकारीकाअनुसार माओवादीले सुरुवातदेखि नै प्रचण्ड नेतृत्वको सरकारले विश्वासको मत नपाएको अवस्थामा धारा ७६ को उपधारा ३ अनुसार नयाँ सरकार गठन हुने र यसैलाई आधार मानेर राष्ट्रपतिले नयाँ सरकारको गठनका लागि आह्वान गर्नुपर्ने जिकिर गरिरहेको छ । माओवादीको एक्लो शक्तिले मात्र यस्तो जिकिर नभएको निश्कर्ष निकाल्दै एमाले र कांग्रेसले सम्भावित कदमहरुलाई रोक्न र राष्ट्रपति रामचन्द्र पौडेललाई धारा ७६ को उपधारा २ अनुसार नै सरकार गठनका लागि आह्वान गर्न बाध्य बनाउन प्रतिनिधिसभाका दुईतिहाई सांसदहरुको हस्ताक्षर नै तयार गरेका छन् । दुईतिहाई बढी सांसदहरुको समर्थन र हस्ताक्षरसहित प्रचण्डले विश्वासको मत नपाएलगत्तै एमाले अध्यक्ष केपी शर्मा ओलीलाई प्रधानमन्त्री बनाउनुपर्ने अपीलसहितको राष्ट्रपति समक्ष समावेदन दिने तयारी गरिएको हो । भोलि संसदमा प्रधानमन्त्री दाहालले विश्वासको मत नपाएको सूचनाको विषयमा संसद सचिवालयले राष्ट्रपति कार्यालयमा लिखित जानकारी पठाउनेछ । त्यसलगत्तै कांग्रेस र एमाले लगायतका दलका दुईतिहाई सांसदहरुको हस्ताक्षर रहेको समावेदन राष्ट्रपतिसमक्ष बुझाइनेछ । काँग्रेस र एमालेका नेताहरुले अन्तिम अवस्थासम्म पनि माओवादीले खेलमा गडबड गर्ने प्रयासलाई जारी राखेको दाबी गरिरहेका छन् । केही विदेशी तत्वहरुले समेत यसमा साथ दिएकाले राजनीतिमा जुनसुकै ट्वीस्ट आउनसक्ने भन्दै संयुक्त सरकार चलाउने लगायतका विषयमा सहमति गरेका कांग्रेस र एमालेका नेताहरु समेत हाई–अलर्टमा बसेका छन् । यदि राष्टपति पौडेलले धारा ७६ को उपधारा ३ अनुसार नयाँ सरकार गठनका लागि आह्वान भएमा केपी ओली प्रधानमन्त्री बन्ने छैनन् । किनभने उपधारा ३ मा संसदको सबैभन्दा ठूलो दलका नेताको नेतृत्वमा सरकार गठनका लागि आह्वान गर्नुपर्ने संवैधानिक व्यवस्था छ । यस्तो अवस्थामा कांग्रेस सभापति शेरबहादुर देउवा प्रधानमन्त्री बन्नेछन् ।