काठमाडौं । कोरोना कहरसँग अग्र मोर्चामा खटिएर लड्ने स्वास्थ्यकर्मीलाई सबैको सहयोग र हौसला आवश्यक रहेको बेला राजधानीमा भने स्वास्थ्यकर्मीमाथि यस्तो हर्कत गरियो जुन सभ्य समाजले पचाउन सक्दैन ।
यही बेला काठमाडौंका प्रमुख जिल्ला अधिकारी जनकराज दाहालले भने स्वास्थ्यकर्मीलाई दुर्व्यवहार गर्नेलाई पाता फर्काएर ६ महिना जेल हाल्ने चेतावनी दिएका छन्। नेपाल टेलिभिजनसँग कुरा गर्दै प्रमुख जिल्ला अधिकारी दाहालले स्वास्थ्यकर्मीलाई दुर्व्यवहार र अवरोध गर्ने जो सुकैलाई खोजी खोजी ६ महिना जेल हाल्ने चेतावनी दिएका हुन् ।
दाहालले त्यस्ता व्यक्तिलाई खोजीखोजी संक्रामक रोग ऐन, २०२० अन्तर्गत कारबाही गर्ने चेतावनी दिए । सिडिओ दाहाल भन्छन्, स्वास्थ्यकर्मी र सुरक्षाकर्मी भगवान हुन्, त्यस्तालाई रोक्नेलाई पाता फर्काएर ६ महिना जेल हाल्छु । मैले सुरक्षाकर्मीलाई पक्राउ गर्न निर्देशन दिइसकेको छु । मध्य बानेश्वरस्थित सिभिल अस्पतालका स्वास्थ्यकर्मीलाई राखिएको भन्दै शनिबार स्थानीयले त्यहाँको होस्टेल घेराउ गर्दै सञ्चालकलाई धम्की दिएका थिए ।
स्वास्थ्यकर्मीमाथि विभिन्न स्थानमा पटक–पटक दुर्व्यवहार हुँदै आएको छ । कोरोनाको महामारीमा ज्यानलाई दाउमा राख्दै बिरामीको उपचार गरिरहेका स्वास्थ्यकर्मीमाथि भएको यो अमानवीय गतिविधिको चौतर्फी विरोध भएको छ ।
