काठमाडौं । नेपाल सरकारको स्वामित्वमा रहेका दुई कम्पनीबीचको सम्झौता भंग भएको छ । कर्मचारी संचय कोषले नेपाल सरकारकै स्वामितवमा रहेको निर्जिवन बीमा कम्पनी राष्ट्रिय बीमा कम्पनीसँगको सम्झौता भंग गरेको हो । सञ्चय कोषले यही पुस १ गतेदेखि लागू हुने गरी आगामी वर्षको लागि नयाँ बीमा पोलिसी जारी नगरेको राष्ट्रिय बीमा कम्पनीले जनाएको छ । तीन वर्षको लागि सम्झौता गरेको कोषले राष्ट्रिय बीमा कम्पनीले दावी भुक्तानीमा झन्झट गरेको भन्दै गत वर्ष गरेको उक्त सम्झौता एकतर्फी रुपमा भंग गरेको हो । राष्ट्रिय बीमा कम्पनीले भने सम्झौता अझै भंग भइनसकेको दाबी गरेको छ । राष्ट्रिय बीमा कम्पनीले केही अप्ठेरो परेको हो भने ती बुँदाहरु संशोधन गरेरै भए पनि सम्झौता नविकरण गर्ने पक्षमा देखिएको छ ।
राष्ट्रिय बीमा कम्पनीका सिईओ डिल्लीराज अर्यालले कर्मचारी संचय कोषले गत वर्ष पुस १ गतेदेखि सुरु गरेको छ लाख कर्मचारीको स्वास्थ्य बीमा नविकरण नगरेको जनाएका छन् । तर यतिकै भरमा सम्झौता भंग भएको भन्न नमिल्ने उनले बताएका छन् ।