एजेन्सी । धेरैले गरेको भविष्य बाणि मिल्दैन । तर कोही कोहीले गरेको भविष्यबाणि ठ्याक्कै मिल्न जान्छ । एक किशोरीले फेसबुकमा पोस्ट गर्दै आफ्नो हत्या हुने भविष्यवाणी गरिन् र हत्याराहरुले उनको लाश भएको ठाउँको जानकारी समेत पठाउने बताइन् । नभन्दै त्यसको केही घण्टामा उनको निर्मम तरिकाले हत्या गरियो । ब्राजिलकी १७ वर्षकी क्रिस्टिन कार्वाल्हो गुइमरेज आफूले स्थानीय ड्रग डिलरलाई ३ हजार ब्राजिलियन रियल ऋण तिर्नुपर्ने भएपछि आफ्नो हत्या हुन लागेको बताएकी थिइन् । उनले लेखेकी थिइन् ‘म यहाँ सबैलाई गुडबाइ भन्न आएकी हुँ । म छिटै मर्दैछु ।’ उनको हत्या ब्रजिलको अमेजोनस राज्यको इटापिरांगामा फेब्रुअरी १३ मा भएको थियो । अर्को एक पोस्टमा क्रिस्टिनले लेखेकी थिइन् ‘उनीहरुले लोकेसन पठाउनेछन् ताकि मेरो लाश भेट्न सकियोस् ।’ त्यसको भोलिपल्ट उनकै प्रोफाइलबाट अर्को एक पोस्ट शेयर गरियो । यो उनका हत्याराहरुले शेयर गरेको जस्तो देखिन्थ्यो किनकि त्यसमा उनको लाश भएको ठाउँ बताइएको थियो र उनको लाश ठिक त्यही ठाउँमा भेटियो ।’
द सनको रिपोर्टअनुसार भोलिपल्ट शेयर गरिएको पोस्टमा अन्तिममा सीभी लेखिएको थियो जो स्थानीय आपराधिक ग्याङ कमाण्डो भर्मेल्हो हुन सक्ने मानिएको छ । यी किशोरी हराएकोबारे पुलिसलाई १२ फेब्रुअरीमै जानकारी प्राप्त भएको थियो । तर, भोलिपल्ट हत्याराहरुले खुलासा गरेको स्थानमा पुलिस अधिकारीहरुले उनलाई भेट्दा उनको हत्या भइसकेको थियो । उनको मृत्युको कारण खुलाइएको छैन यद्यपि उनले फेसबुक पोस्टमा आफूलाई गोली हानिने बताएकी थिइन् । अनुसन्धान अधिकारीहरुले भने किशोरीको हत्यामा कमाण्डो भर्मेल्होको कुनै हात नरहेको र उनका हत्याराले अनुसन्धानलाई अल्मल्याउन यो ग्याङको नाम उल्लेख गरेको अनुमान गरेका छन् । पुलिस अधिकारीहरुले क्रिस्टिनले लेखेको भनिएका अघिल्ला पोस्टहरु पनि हत्याराहरुले नै लेखेको विश्वास गरेका छन् । अनुसन्धानकर्ताहरुले फेब्रुअरी १७ मा भएका अन्य २ हत्याहरु पनि क्रिस्टिनको हत्यासँग सम्बन्धित भएको विश्वास गरेका छन् ।
फेब्रुअरी १७ मा लोरिभाल फोन्सेकामोराएस र एन्टोनियो मोन्टेरियो डोस सान्तोसको हत्या भएको थियो । यी दुई क्रिस्टिनका दाजु र भिनाजु थिए । यी दुवैको नाम क्रिस्टिनले आफ्नो हत्याराको रुपमा आफ्नो फेसबुक पोस्टमा उल्लेख गरेकी थिइन् । उनहिरुको शवको प्रकृति हेर्दा उनीहरुको पनि हत्या भएको देखिएको छ ।