एजेन्सी । नेपाली श्रमिकहरुको रोजगार गन्तव्यको रुपमा रहेको कुवेतमा थप ९ जनामा कोरोना संक्रमण पुष्टि भएसँगै कुवेतमा कोरोना संक्रमण पुष्टि भएका नेपालीहरुको संख्या ८४ पुगेको दूतावासले बताएको छ । पछिल्लो अवस्थामा कुवेतमा कोरोना संक्रमण पुष्टि हुनेहरुको संख्या निकै वृद्धि भएको दूतावासले बताएको छ । ३ मे २०२० सम्ममा कुवेतमा ८४ जना नेपालीसहित ४ हजार ९ सय ८३ जनामा कोरोना पुष्टि भएको दूतावासले जारी गरेको सूचनामा उल्लेख छ । पर्याप्त सतर्कता अपनाउन र शंका लागेमा तत्काल स्वास्थ्य परीक्षण गराउन पनि नेपाली जनसमुदायलाई दूतावासले आग्रह गरेको छ । कोरोना संक्रमणका कारण काममा जान नपाउँदा रोजगारदाताबाट पाउनुपर्ने तलब, सुविधा नपाएको तथा खानेकुराको समेत अभाव भएर कठिनाइ उत्पन्न भएमा दूतावासमा, कम्पनीमा वा रोजगारदाता व्यवस्थापन पक्षसँग सम्पर्क गर्न दूतावासले आग्रह गरेको छ ।