काठमाडौं । लक्ष्मीप्रपन्न निरौला कृषि विकास बैंकको अध्यक्षमा नियुक्त भएका छन् । सरकारको मन्त्रीस्तरीय निर्णयबाट कृषि विकास बैंकको सञ्चालकमा नियुक्त भएका उनी सञ्चालक समितिको बैठकबाट सर्वसम्मत चुनिएका हुन् । अध्यक्ष निरौलाले बुधबार नै गभर्नर डा. चिरञ्जीवि नेपालबाट पद तथा गोपनियताको शपथसमेत लिएका छन् । मुद्रा व्यवस्थापन विभागको कार्यकारी निर्देशकको रुपमा लामो समयको अनुभव बटुलेका उनले गत माघमा अवकास पाएका थिए । निरौलाले ०४६ माघ ८ गते राष्ट्र बैंकको नोकरी सुरु गरेर ०७२ भदौ ११ गते कार्यकारी निर्देशकमा बढुवा भएका थिए । गत १८ कात्तिकमा नेपाल राष्ट्र बैंकले आफ्नै डेपुटी गभर्नर शिवराज श्रेष्ठमाथि विभिन्न आरोपमा छानबिन गर्दा निरौलाको नाम नयाँ डेपुटी गभर्नरको रूपमा आउन सक्ने चर्चामा थियो । राष्ट्र बैंकमा उनी अन्य कार्यकारी निर्देशकभन्दा वरिष्ठ भएकाले स्वाभाविक पनि थियो । तर, मन्त्रिपरिषद्ले श्रेष्ठलाई क्लिन चिट दिएसँगै निरौलाको डेपुटी गभर्नर बन्ने सम्भावना सकिएको थियो । नेकपा निकट मानिएका निरौलाले अवकासलगत्तै कृषि विकास बैंकको अध्यक्ष हुने सौभाग्य पाएका छन् ।