काठमाडौं । अन्तरराष्ट्रिय मुद्रा कोष (आईएमएफ) ले कोरोना भाइरस प्रभावित देशका लागि ५० अर्ब डलर सहायता प्रदान गर्ने घोषणा गरेको छ । कोषले उक्त रकम गरिब तथा मध्य आय भएका देशहरुलाई भाइरससँग लड्नका लागि सहायता स्वरुप उपलब्ध गराउने बताएको छ । कमजोर स्वास्थ्य प्रणाली भएका र रोगसँग लड्न संघर्ष गरिरहेका देशहरुका लागि उक्त रकम उपलब्ध गराउने कोषले जनाएको छ । यसैगरी कोषले भाइरसको प्रकोपसँगै यो वर्षको आर्थिक वृद्धि गत वर्षको तुलनामा पछाडि परिसकेको भन्दै चेतावनी दिएको छ ।
कोषले विश्वमा महामारीको रुपमा फैलिएको कोरोना भाइरसको कारण विश्वको आर्थिक वृद्धिमा मन्दी आउने बताएको छ । कोरोना भाइरसको महामारी अझै नियन्त्रण नहुने हो भने सन २००८ यताकै आर्थिक मन्दी हुने पनि चेतावनी पनि दिएको छ । भाइरसको प्रकोप चीन बाहिरका ७० भन्दा धेरै देशहरुमा फैलिसकेकाले आपतकालको घोषणा गरिसकेको छ । योसँगै यसै हप्ता कोरोना भाइरसको प्रभाव कम गर्नका लागि विश्वभरका सरकार र त्यहाँका केन्द्रीय बैंकहरुले प्रकृया सुरु गरेका छन् । कोषका म्यानेजिङ डाइरेक्टर क्रिष्टिएन जर्जिभाले कोरोना भाइरसविरुद्ध थप सावधानी नअपनाउने हो भने विश्वका धेरै मुलुकमा आर्थिक मन्दी शुरु हुने र यसले पार्न सक्ने क्षेत्रका बारेमा अहिले केहि अनुमान लगाउन नसकिने पनि चेतावनी दिएकी छन् ।